Petropavlda voleıboldan qyzdar arasynda qysqy el chempıonaty bastaldy
PETROPAVL. QazAqparat – Petropavlda 11-12 jastaǵy qyzdar arasynda voleıboldan respýblıkalyq qysqy chempıonat bastaldy. Jarys 10 qańtarǵa deıin jalǵasady, dep habarlaıdy QazAqparat tilshisi.
Respýblıkalyq chempıonatqa 14 komanda qatysyp jatyr. Onyń ekeýi -soltústikqazaqstandyq. Solardyń biri - «Kuanish» komandasy. Búginde bul klýbta 124 jasóspirim qyz jattyǵady. Olar byltyr kúzgi chempıonatta qola medal enshilegen edi. Bul joly da jeńis tuǵyrynan kóriný úshin jarysqa joǵary daıyndyqpen kelip otyr.
«Buǵan deıin júldeli orynnan kóringendikten bizge qoıylatyn talap joǵary. Chempıonatqa daıyndaldyq. Ári tek «birinshi oryn alamyz» degen oımen qatysyp jatyrmyz. Ózimizdiń alańda oınap jatqandyqtan bizge basqalaryna qaraǵanda jeńilirek. Jankúıerlerimiz qoldaý kórsetýde», - deıdi «Kuanish» komandasynyń oıynshysy Elızaveta Şýkına.
Birinshi bolyp jarys alańyna SQO-nyń quramasy men Pavlodardyń «Ertis-Qazhromy» shyqty. Qyzdar dopty kópke deıin jerge túsirmeı, sheberlikterin kórsete bildi.
«Komandalalar bir-birine saı. Búginde balalar voleıbolynyń deńgeıi ósken. Oıyn qyzyqty, qyzdar tyrysyp baǵady. Jattyqtyrýshylardyń jaqsy jumysyn kórip otyrmyz. Qazirgi ýaqytta osyndaı qysqy chempıonat Petropavldan basqa Óskemende, Oralda ótip jatyr. Ol jaqta basqa jastaǵy qyzdar qatysýda», - deıdi chempıonattyń bas tóreshisi Anastasııa Kokına.
Qyzdar arasynda voleıboldan ótip jatqan respýblıkalyq qysqy chempıonattyń jeńimpazdary 10 qańtarǵa deıin anyqtalmaq.
