Petropavlda velosıped urlyǵy órship tur
PETROPAVL. QazAqparat - Petropavlda velosıped urlyǵy artqandyqtan, tártip saqshylary qala turǵyndaryn múlkine saq bolýǵa shaqyryp, úı-úıdi aralaýǵa shyqty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, jaz mezgilinde velosıped, samokattar men gıroskýterlerdi urlaýmen aınalysatyndardyń belsendiligi artady. Mańdaı termen tapqan múlik urylardyń ońaı oljasyna aınalmaýy úshin tártip saqshylary turǵyndardy saqtyq sharalaryn kúsheıtý qajettigin eskertedi.
Mamandardyń aıtýynsha, velosıpedter kóbine úılerdiń kireberisi men dúkenderdiń mańynan qoldy bolady. Oǵan sebep kólik - aıdap áketýge qarsy senimdi qurylǵylarmen jabdyqtalmaıdy, beıne baqylaý kameralary joq jerde qaldyrylady. Qylmystyń aldyn alý úshin krımınaldyq polıtsııa qyzmetkerleri úı-úıdi aralap, turǵyndarǵa jadynamalar taratty.
«Velosıpedter suranysqa ıe, sol sebepti urlyqtyń da sany artqan. Kólikti podezdiń, saýda úıiniń nemese banktiń qasynda qaldyratyn bolsańyz, beınekameranyń astyna qoıyńyz. Budan bólek, velosıped ıeleri kólikteriniń serııalyq nómirlerin bilgeni jón. Nómir ádette ramada nemese tepkide jazylady. Túngi ýaqytta velosıpedterdi podezderde, úıdiń mańynda qaraýsyz qaldyrmaýlaryńyzdy suraımyz», - deıdi krımınaldyq polıtsııa bóliminiń jedel ýákili Jeńisgúl Beısembına.
Polıtseılerdiń aıtýynsha, jyl basynan beri Petropavl qalasynyń aýmaǵynda 79 velosıped urlyǵy tirkelgen. Tártip saqshylary urlyq jasalǵan jaǵdaıda birden «102» nómirine habarlasý qajettigin eskertedi. Ýaqtyly júgingen jaǵdaıda, uryny izin sýytpaı ustaýǵa múmkindik bar.
