Petropavlda vandaldarmen kúresý úshin erekshe beınekameralar ornatylady

PETROPAVL. QazAqparat – Petropavlda bıyl qala kóshelerine qosymsha 188 beınekamera ornatylmaq, onyń 50-i búginde saıabaqtarǵa qoıyldy, dep habarlaıdy QazAqparat tilshisi.

Petropavl qalalyq ákimdiginiń málimetinshe, vandaldarmen kúresý maqsatynda bıyl aıaldamalardyń mańyna datchıgi bar beınekameralar qoıylady. Olar synǵan áınekke birden áreket etip, jazyp alady.

Buǵan deıin oblys ortalyǵyndaǵy Hrom zaýyty, Jumysshy kenti, Borkı jáne Solnechnyı kentterinde buzaqylar áınekten jasalǵan avtobýs aıaldamalaryn syndyrǵan edi. Birinshi kezekte osy oryndarǵa datchıgi bar beınekameralar qoıylmaq.

Jalpy bıyl Petropavlda qosymsha 188 beınakamera paıda bolady. Olar aıaldamalardan bólek stadıondarǵa, eskertkishterdiń mańyna, aýlalarǵa, tipti qoqys tógetin alańdarǵa, saıajaı qoǵamdaryna da ornatylady. Olardyń 50-i búginde saıabaqtarǵa qoıyldy.

Beınekameralardyń barlyǵy Ikomek-109 ahýaldyq ortalyǵyna jáne Soltústik Qazaqstan oblystyq polıtsııasy departamentiniń jedel basqarý ortalyǵyna qosylady.

Qazir Petropavlda 400-den astam beınekamera jumys istep tur.