Petropavlda uzaq úzilisten keıin elektrondy tablolar iske qosylmaq

PETROPAVL. QazAqparat – Petropavlda qyrkúıek aıynda avtobýs baǵyttary jaıynda aqparat beretin elektrondy tablolar iske qosylmaq. Bıýdjet qarajatyna 5 jyl buryn satyp alynyp, olar eki jyldaı ǵana jumys istep, keıin isten shyqqan bolatyn, dep habarlaıdy QazAqparat tilshisi.

Petropavlda elektrondy tablolar 2018 jyly paıda boldy. Ol jerden qaı avtobýstyń neshe mınýttan keıin keletinin, aýa temperatýrasyn bilýge bolatyn. Alaıda olar uzaqqa barmaı synyp, isten shyqty.

Petropavl qalasy ákiminiń orynbasary Ádilbek Áýbákirovtyń aıtýynsha, oblys ortalyǵynda jazda Infobus júıesi engizildi. Jaqynda konkýrs ótip, endi 31 elektrondy tablo jóndelip, iske qosylmaq.

«Kelesi kezekte jolaýshylar aǵynyn anyqtaý úshin arnaıy datchıkti ornatpaqpyz. Osylaısha jolaýshy tasymaldaýshylar qanshalyqty ashyq jumys istep jatyr, shyn kirisi qansha ekenin anyqtaımyz, bizge baqylaý úshin kerek. Buǵan qalalyq bıýdjetten qarajat bólindi, qurylǵylardy jańa avtobýstarǵa ornatamyz», - deıdi Ádilbek Áýbákirov.

Jalpy byltyr jolaýshy tasymalyna Petropavl bıýdjetinen 2 mlrd teńgeden astam sýbsıdııa bólindi, bıyl onyń mólsheri 3 mlrd teńgege jetip, kásipkerler onyń bir bóligin alǵan. Bul qarajat jolaýshy tasymaldaýshylardyń shyǵynyn óteý úshin beriledi.

«Búgin qoǵamdyq kólikte júrý aqysy ósetinin aıttyq. Kartochkamen 100 teńge, qolma-qol aqshamen 170 teńge tóleıdi. Eki tarıf belgileý arqyly sybaılas jemqorlyq táýekelderin boldyrmaýdy maqsat ettik. Óıtkeni keıbir júrgizýshiler jolaqyny qaltasyna basyp qalyp jatady. Sondyqtan qolma-qol aqyny barynsha azaıtýymyz kerek», - deıdi qala ákiminiń orynbasary.

Bıyl Petropavlǵa jańa 11 avtobýs alyndy. Áli de avtobýs parki jańalanady, tasymaldaýshylar qazir bul máselemen aınalysyp jatyr. Qazirgi ýaqytta oblys ortalyǵyndaǵy qoǵamdyq kólikterdiń 58% - jańa.