Petropavlda úıinen ketip qalǵan apaly-sińlili jasóspirim qyzdar tabyldy
PETROPAVL. QazAqparat - Soltústik Qazaqstan oblysynda joǵalyp ketken apaly-sińlili jasóspirim qyzdar aman tabyldy, dep habarlaıdy QazAqparat Polisia.kz resýrsyna silteme jasap.
15 shilde túngi 23.50 kezinde 102 qyzmetine qońyraý túsip, 14 jáne 16 jastaǵy eki qyzdyń úıden ketip qalǵany habarlanǵan.
Polıtsııa qyzmetkerleri qyzdardyń Qyzyljar aýdanynyń Zaton aýylynda bolǵanyn anyqtady.
Apaly-sińlili qyzdardy izdeýge krımınaldy polıtsııa, ıývenaldy polıtsııa, patrýl polıtsııasy sekildi búkil qyzmetter kúsh saldy.
Sonymen qatar volonterler men qyzdar oqıtyn mekteptiń áleýmettik pedagogteri de kómekke keldi.
Keıin anyqtalǵandaı, 16 jastaǵy úlken qyz buǵan deıin de birneshe márte úıinen ketken.
Qazirgi tańda olardyń Altynsarın kóshesindegi bir páterde ekeni anyqtalyp otyr. Qyzdar bir dosynyń úıinde bolǵan.
«Jaqyndary izdeý salatyn jasóspirimder kóp jaǵdaıda eresekterdiń aıtqanyn tyńdamaıdy, olarǵa baǵynbaı, úıden shyǵyp ketedi. Mundaı jaýapsyzdyq polıtseılerdiń jumysyn qıyndatyp jiberedi. Kóbinde balalar jaı ǵana dostarymen kóńil kóterip júredi, sóıte turyp ata-anasyna qaıda ekenin eskerte salýǵa moıny jar bermeıdi», - deıdi Petropavl ıývenaldy polıtsııasynyń aǵa ınspektory Bekzat Chıstobaev.
Jyl basynan beri polıtseıler habar-osharsyz ketken 67 balany izdep tapqan. Olar kóp jaǵdaıda bir táýliktiń ishinde tabylady.
