Petropavlda úıi órtenip ketken 7 otbasyǵa ýaqytsha baspana beriledi – SQO ákimi

PETROPAVL. QazAqparat – Petropavlda jeti otbasy órttiń saldarynan baspanasyz qaldy. Qazir olar mektepte ashylǵan evakýatsııalyq pýnkte turyp jatyr, dep habarlaıdy QazAqparat tilshisi.

Soltústik Qazaqstan oblysynyń ákimi Aıdarbek Saparov órtten zardap shekkender ýaqytsha baspanamen qamtylatynyn aıtty.

«Bereke» shaǵynaýdanynda órt shyǵyp, búlingen úılerdiń turǵyndary №25 mekteptegi evakýatsııalyq pýnktine ýaqytsha ornalasty. Olar tamaq jáne jatyn orynmen qamtamasyz etildi.

Órtten zardap shekkendermen kezdestim. Arnaıy komıssııa quryldy. Turǵyndar ýaqytsha baspanamen qamtamasyz etiledi», - dep jazdy oblys basshysy áleýmettik jelidegi paraqshasynda.

Petropavl qalasy ákimdiginiń baspasóz qyzmeti zardap shekken turǵyndarǵa gýmanıtarlyq kómek jınaý bastalǵanyn habarlady.

«Búlinbeıtin azyq-túlik, turmystyq hımııa, taza kıim-keshekti qalalyq mádenıet úıine ákelip tapsyrýǵa bolady.

Mekenjaıy: Petropavl qalasy, Sátbaev kóshesi, 37», - delingen habarlamada.

Pýnkt gýmanıtarlyq kómekti saǵat 9.00-den keshki saǵat 20.00-ge deıin qabyldaıdy.

Esterińizge salaıyq, keshe Petropavldaǵy «Bereke» yqshamaýdanynda qamys janyp, arty úlken órtke ulasty. Saldarynan 40 adamdy qaýipsiz jerge shyǵarýǵa týra keldi.

Qatty jel jalyndy aýyzdyqtaýǵa mursha bermeı, 140-qa jýyq maman órtti 3 saǵat boıy sóndirdi.

Órt kezinde 9 baspana (ekeýi bos turǵan), kásiporynnyń garajy jáne 3 avtobýs túgi qalmaı janyp ketti.