Petropavlda úıdiń jertólesinen 1 tsentnerden astam marıhýana tabyldy

PETROPAVL. QazAqparat – Petropavl polıtseıleri qala turǵynynyń jertólesinen 113 kg marıhýana taýyp, tárkiledi, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, maqsatty jedel-izdestirý is-sharalarynyń nátıjesinde esirtki qylmysyna qarsy is-qımyl basqarmasynyń qyzmetkerleri Petropavldyń 36 jáne 48 jastaǵy eki turǵynyn ustady. Olardyń bireýiniń Gogol kóshesinde ornalasqan úıiniń jertólesinen polıtseıler 4 qap ósimdiktektes zatty tárkiledi. Saraptama kórsetkendeı, bul jalpy salmaǵy 113 kg asatyn keptirilgen marıhýana bolyp shyqty.

Bul derek QR Qylmystyq kodeksiniń 297-baby boıynsha sotqa deıingi tergep-tekserýlerdiń biryńǵaı tiziliminde tirkeldi. Satý maqsatynda asa iri mólsherde esirtki saqtady degen kúdikpen bireýi qamaýǵa alyndy, ekinshisine qatysty kelý týraly mindetteme túrindegi májbúrleý sharasy tańdaldy. Tergeý júrip jatyr, polıtsııa qyzmetkerleri iri kólemdegi esirtkiniń qaıdan kelgenin anyqtamaq.

«Bul oblysta jyl basynan tárkilengen marıhýananyń ekinshi asa iri partııasy. Teorııalyq turǵydan alǵanda, tárkilengen bul esirtki Petropavldyń barlyq turǵyndaryn nashaqorlyqqa tartý úshin jetkilikti. Esterińizge sala keteıik, asa iri mólsherde esirtki satqany úshin 10 jyldan 15 jylǵa deıin bas bostandyǵynan aıyrý jazasy qarastyrylǵan», - deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.

Jyl basynan beri oblys polıtseıleri 600 kg astam túrli esirtki, onyń ishinde 1 kg astam sıntetıkalyq esirtki tárkiledi.