Petropavlda úıden shyǵyp ketken zeınetker áıel aıazda úsik shalyp, mert boldy

PETROPAVL. KAZINFORM – Petropavlda bir kún buryn izdeý jarııalanǵan zeınetker áıel tiri tabylǵanymen, dárigerler onyń ómirine arasha túse almady.

14 qańtar kúni Petropavlda 314 atqyshtar dıvızııasy kóshesinde ornalasqan úılerdiń birinde turatyn 75 jastaǵy áıeldiń joǵalǵany týraly aqparat tarady.

Soltústik Qazaqstan oblystyq polıtsııa departamenti baspasóz qyzmetiniń málimetinshe, zeınetker shamamen túski saǵat 13.00 shamasynda úıinen emhanaǵa barmaq bolyp shyǵyp, qaıta oralmaǵan. Onyń uıaly telefony óshirýli bolǵan. Densaýlyq jaǵdaıyna baılanysty áıeldiń baǵdardan jańylýy múmkin ekendigi aıtyldy.

Habar túsken sátten bastap zeınetkerdi izdeýge qalalyq polıtsııa basqarmasy men oblystyq polıtsııa departamentiniń qyzmetkerleri, arnaıy jedel áreket etý jasaǵynyń jaýyngerleri, Ulttyq ulannyń áskerı qyzmetshileri, sondaı-aq eriktiler jumyldyryldy. Іzdeý jumystaryna 60-qa jýyq adam qatysyp, áıel bolýy múmkin oryndar tekserildi. Sonymen qatar, kóshelerdegi beınebaqylaý kameralarynyń jazbalary zerdelendi. Aýa raıynyń qolaısyzdyǵyna baılanysty izdeý sharalary kúrdelene tústi.

15 qańtar kúni tańerteń qart áıeldi ýchaskelik polıtsııa ınspektory adamdar sırek júretin aýmaqta, aýrýhana mańyndaǵy sharýashylyq ǵımarattyń janynan, qorshaýdyń túbinen tapty. Áıeldiń jaǵdaıy aýyr bolǵan, ol qatty úsik shalý saldarynan qozǵala almaǵan. Zeınetker jedel túrde jedel járdem brıgadasyna tapsyrylyp, kórsetilgen medıtsınalyq kómekke qaramastan, kóz jumdy.

Qazirgi ýaqytta atalǵan derek qylmystyq is qozǵalyp, tergeý amaldary júrgizilip jatyr.

Buǵan deıin Aqtaý qalasynan Beıneýge baǵyt alǵan avtobýs apatqa ushyrap, 4 adam mert bolǵanyn jazǵan edik.