Petropavlda úıde jalǵyz qalǵan 4 jasar bala besinshi qabattan qulap kete jazdady

PETROPAVL. QazAqparat – Petropavlda polıtseıler 4 jasar búldirshinniń ómirine arasha túsip, onyń besinshi qabattaǵy terezeden qulap ketýine jol bermedi, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, jergilikti polıtsııa qyzmeti basqarmasynyń qyzmetkerleri Sergeı Zemskıı men Erbolat Qojahmetov túski úziliske shyqqan.

Olar Volodarskıı kóshesimen ótip bara jatyp, besinshi qabattaǵy ashyq turǵan terezeniń jaqtaýynda túregep turǵan balany baıqap qaldy.

Polıtseıler oqys oqıǵanyń aldyn alý úshin balamen sóılesip, ony páterge kirýge kóndiredi.

Búldirshinniń terezeni japqanyna kóz jetkizgen tártip saqshylary joǵary kóterilip, páterdi anyqtady.

Ondaǵy oı – ata-anasy kelgenge deıin balany esiktiń syrtynan bolsyn aldandyryp, terezege jaqyndaýyna jol bermeý.

Oqıǵa ornyna olar ıývenaldyq polıtsııa qyzmetkerin shaqyrdy jáne kórshileri arqyly er balanyń ata-anasynyń telefon nómirin taýyp, habar berdi.

4 jasar balanyń anasy ózine múgedektik resimdemek bolǵan. Sondyqtan eresekterdiń ekeýi de balany jalǵyz qaldyryp, aýrýhanaǵa ketken.

«Ata-anamen profılaktıkalyq áńgime júrgizildi, sonymen birge terezege tolyq ashylmaýy úshin bekitkishter ornatýdy usyndyq. Muny úıinde kishkentaı balalary bar barlyq adamdar qoıýy kerek. Jergilikti polıtsııa qyzmetiniń qyzmetkerleri men qutqarýshylar qaýipsizdik sharalaryn únemi eske salyp otyrady. Mysaly, terezeniń janyna oryndyqtar men bala terezege kóterile alatyn basqa da zattardy qoıýǵa bolmaıdy. Saq bolyńyzdar jáne balalardy qaraýsyz jalǵyz qaldyrmańyzdar», – dedi Erbolat Qojahmetov.