Petropavlda úı janýarlary ýaqytsha panalaıtyn baspana salynady

PETROPAVL. QazAqparat – Soltústik Qazaqstan oblysynda janýarlarǵa jaýapkershilikpen qaraý zańyn júzege asyrý aıasynda bıyl qańǵyrǵan ıt-mysyqty aýlaýǵa, ýaqytsha ustaýǵa, vaktsına egýge jáne sterılızatsııalaýǵa 53,4 mln teńge bólindi, dep habarlaıdy QazAqparat tilshisi.

SQO veterınarııa basqarmasynyń málimetinshe, halyqtyń áleýmettik osal toptary úı janýarlaryn bıýdjet esebinen tegin sáıkestendirý rásiminen ótkize alady.

Óńirde 10 sáýirden bastap ıesiz janýarlardy sterılızatsııalaý jumystary bastaldy.

Búgingi kúni 43 ıt, 3 mysyq aýlanyp, chıp salyndy jáne sterılızatsııalandy. Olardyń basym bóligi júrgen jerine, ıaǵnı kóshege qaıtaryldy.

Úı janýarlaryn esepke alatyn «TANBA» aqparattyq servısine 704 úı janýary esepke qoıyldy, onyń ishinde ıesiz ıt-mysyq ta bar.

Sondaı-aq bıyl Petropavl qalasynyń ákimdigi ýaqytsha ustaý pýnktin salý úshin jobalyq-smetalyq qujattamany ázirleýge 13 mln teńge qarajat bóldi.

Qazirgi ýaqytta oblysta 3 jekemenshik panajaı jumys isteıdi, onyń ekeýi Petropavlda ornalasqan.

«Belyı Bım» 400 ıtke, «Isakov Andreı» jekemenshik qaıyrymdylyq qorynyń nysany 300 mysyq pen 500 ıtke, Qyzyljar aýdany Vıshnevka aýylyndaǵy «Shans na jızn» panajaıy 500 ıtke arnalǵan.

Onyń bári búginde tolyq.

Al jyl basynan beri oblysta úı janýarlaryn ustaý jáne serýendetý erejelerin buzǵany úshin 401 adam ákimshilik jaýapqa tartyldy.