Petropavlda úı qabyrǵasy qulap, turǵyndar baspanasyz qaldy
ASTANA. QazAqparat - Petropavlda eki qabatty úıdiń qasbeti opyryla qulap, turǵyndar dalada qaldy. Qutqarýshylar oqıǵa ornynan 8 adamdy syrtqa shyǵardy, ekeýi bala, dep habarlaıdy «QazAqparat» HAA Habar 24-ke silteme jasap.
Áıteýir zardap shekkender joq. 1950 jyldary turǵyzylǵan turǵyn úı osydan tórt jyl buryn apatty dep tanylǵan eken. Degenmen, búgingi kúnge deıin munda úsh otbasy, jalpy 13 adam turyp kelgen. «Bereke» shaǵynaýdanynyń turǵyndary osy mańdaǵy taǵy bir úı qulaǵaly tur dep dabyl qaǵyp otyr. Ol da apatty jaǵdaıda tur eken.
«Syrtqa tek kıim-keshegimdi shyǵaryp úlgerdim. Jıhaz, qujat, bári úıde qaldy. Іshke eshkimdi kirgizbeı jatyr. Áıteýir barlyǵy aman», -deıdi qala turǵyny Aleta Sycheva.
Qala ákimi Marat Tasmaǵanbetovtyń aıtýynsha, apatty dep tanylǵan úılerdiń turǵyndaryn baspanamen qamtamasyz etetin turǵyn úı qory joq. «Sondyqtan sizderdi ázirge ýaqytsha páterlerge ornalastaramyz. Aldaǵy ýaqytta bul máseleni sheshetin bolamyz», -deıdi ol.
