Petropavlda úsh júzge tarta saıajaıdy áli sý basyp jatyr
PETROPAVL. QazAqparat - Sý tasqynynyń ótý jáne sý tasqynyna qarsy bıylǵy sharalar týraly Soltústik Qazaqstan oblysy ákiminiń orynbasary Anton Fedıaev aıtyp berdi, dep habarlaıdy QazAqparat tilishisi.
Onyń bergen aqparatyna sáıkes, oblys aýmaǵynda sý tasqynyń ekinshi tolqyny bolmaıdy. Qazirgi ýaqytta Sergeev sý qoımasyndaǵy sý deńgeıi 109 paıyzdy qurap otyr. Toǵannyń jotasynan sýdyń asyp tógilý mólsheri - 52 sm. 19 sáýirden bastap ol mólsher turaqty túrde tómendeıdi. Petropavl sý qoımasyndaǵy deńgeı - 115 paıyz. Munda sý deńgeıiniń tómendeýi 3 mamyrdan bastalǵan. Tek bir táýlik buryn sý deńgeıi ol jerde 24 santımetrge tómendegen. Anton Fedıaevtyń aıtýyna qaraǵanda, aptanyń sońyna deıin deńgeı jobalyq ólshemmen saı kelýi tıis.
«Tasqyn bolǵan kezde oblys aýmaǵynda sý alyp ketken úıler tirkelmedi. Qaıtys bolǵan adam, ólgen mal joq. Saıajaıly jer telimderin sý alyp ketý jaǵdaılary Petropavlda jáne qala shetinde tirkeldi. Ózen sýynyń jaıylyp ketýine baılanysty 1200-in sý alǵan. Qazir sý jylystaǵanymen, 300 jer telimin áli de sý basyp jatyr» - dedi oblys ákiminiń orynbasary.
Sý tasqynynyń ońaı qaıtýyna qar qorynyń tómendigi men kóktemniń uzara túsýi sebep bolǵan.
«Josparlanǵan barlyq sharalar sý tasqyny bastalǵanǵa deıin oryndalǵan. Eń kóp shyǵyndy - Jol kartasy boıynsha atqarylǵan sharalar talap etti, ıaǵnı 3,1 mıllıard teńge jumsaldy. Ol qarajattyń basym bóligi Petropavl qalasynyń Kojevennyı kentindegi dambanyń qurylysyna ketti. Qalǵan qarjy tazartý jáne ınjenerlik qurylymdarǵa jumsaldy. Aýyldardy aınala úıilgen 33 shaqyrymdyq qorshaý asa tıimdiligin kórsetti», - dedi Anton Fedıaev.
Al bıyl sý tasqynyna qarsy sharalarǵa 400 mıllıon teńge jumsaý kózdelip otyr.
«8 sharany júzege asyrý kózdelýde. Negizinen sý ótkizý qurylymdary men Ýálıhan aýdanyndaǵy «Segiz kól» gıdrotehnıkalyq qurylymyna kúrdeli jóndeý júrgizý josparlanǵan», - dep habarlady ol.
Óz kezeginde oblys ákimi Qumar Aqsaqalov taǵy bir márte taldaý jumystaryn júrgizýdi tapsyrdy.
«Qaı jerdi qosymsha kúsheıtý kerek - sol týrasynda usynystardy ázirleńizder. Qosymsha jumystardyń túrlerin qarjylandyrýǵa daıynbyz», - dedi óńir basshysy.
