Petropavlda úsh jasar bala terezeden qulady

PETROPAVL. KAZINFORM – Petropavlda úsh kún ishinde eki bala kópqabatty úıdiń terezesinen qulady.

Birinshi oqıǵa 13 sáýir kúni boldy. Eki jasar bala toǵyz qabatty úıdiń ekinshi qabattaǵy páterdiń terezesinen abaısyzda qulap ketken. 

Qazir búldirshin oblystyq kópbeıindi balalar aýrýhanasynda em alyp jatyr. Araǵa kún salyp, 15 sáýir kúni Petropavlda 3 jasar bala ekinshi qabattaǵy páterdiń terezesinen qulady. Balaqaı aman.

Balalardyń jaraqattaný derekteriniń kóbeıýine baılanysty polıtseıler úndeý jasady. 

- Sáýir aıynda ǵana eki bala kópqabatty úıdiń terezesinen qulap ketti. Onyń bir ǵana sebebi bar – ata-analardyń beıqamdyǵy, balalaryna durys qaramaýy. Sol sebepti balany terezesi ashyq bólmede jalǵyz qaldyrmaýlaryńyzdy suraımyz. Moskıt tory balany qulaýdan saqtamaıdy, sondyqtan arnaıy qurylǵy qoıyp, jıhazdy tereze aldynan alyp tastaǵan jón. Balalaryńyzǵa qamqor bolyńyz, - dedi Petropavl qalalyq Polıtsııa basqarmasynyń bastyǵy Serik Áljanov.

Buǵan deıin Qaraǵandy oblysynda balanyń basyna kirpish qulap, jansaqtaý bólimine jetkizilgenin jazǵan edik.