Petropavlda úsh mektep salynady

PETROPAVL. QazAqparat - Soltústik Qazaqstan oblysynyń ákimi Qumar Aqsaqalov aımaqta bilim salasy úshin qandaı nysandar salynatyny jóninde aıtyp berdi, dep habarlaıdy «QazAqparat» tilshisi.

Petropavlda 600 jáne 900 oryndyq eki mekteptiń qurylysy bastaldy. Oblys ákiminiń sózinshe, olar 2019 jyldyń 1 qyrkúıegine qaraı paıdalanýǵa beriledi.

«Damytýdyń keshendi jospary boıynsha 900 orynǵa arnalǵan taǵy bir mektep salynady», - deıdi ákim.

Odan bólek, 2 myńǵa jýyq orny bar 5 jataqhananyń qurylysy josparlanyp otyr. Sonyń ishinde 1200 oryndyq ekeýi - M.Qozybaev atyndaǵy SQMÝ, 732 oryndyq úsh jataqhana - kolledjderge arnalǵan.

Jergilikti bılik soltústikqazaqstandyq JOO úshin jańa oqý ǵımaratyn salýdy josparlap otyr. Oblys ákimi bul munda bilim alatyn stýdentter sanyn 10 myń adamǵa deıin arttyrýǵa múmkindik beretinin aıtty.

«Bilim granttarynyń sany úsh ese - 300-den 1072-ge deıin kóbeıdi. Tehnıkalyq mamandyqtardy tańdaǵan, muǵalim nemese dáriger bolǵysy keletin stýdentterdiń sany da ósti. Jergilikti bıýdjetten alǵash ret 75 grant bólingen. Bizdiń JOO-da bilim alǵysy keletinderdiń sany 1,7 ese artyp, shetelge ketetin túlekterdiń sany 13 paıyzǵa azaıdy. Bul - jaqsy dınamıka, ony saqtap qalýymyz kerek», - dep atap ótti Q.Aqsaqalov.

Ol Ulttyq gvardııa Áskerı ınstıtýtynyń ǵımarattary men bólimderin, sonyń ishinde kazarmalar, májilis zaly bar oqý korpýsy, sport keshenin salý josparlanǵanyn qosyp ótti.

Avtor: Olesıa Jýkoven