Petropavlda úsh kún ishinde úısiz-kúısiz júrgen 217 adam anyqtaldy
PETROPAVL. QazAqparat – Petropavlda polıtseıler úısiz-kúısiz júrgen 217 adamdy úsh kún ishinde qabyldap-taratý ornyna jetkizdi, dep habarlaıdy QazAqparat tilshisi.
Soltústik Qazaqstan oblysy polıtsııa departamentiniń málimetinshe, qańǵybastardy anyqtap, olardyń tarapynan jasalatyn qylmystardyń aldyn alý úshin polıtsııanyń qabyldaý-taratý ornynyń qyzmetkerleri jıi reıdke shyǵady. Olar qańǵybastar kóp shoǵyrlanatyn aýlalardy, garaj kooperatıvterin, vokzal mańy alańyn tekseredi. Sondaı-aq qalalyqtardan túsken habarlamalar boıynsha da jumys istep, shaqyrtýǵa barady. Jyl basynan qalalyq qabyldaý-taratý ornyna 800-den asa turaqty mekenjaıy joq adam jetkizildi.
Mamandardyń aıtýynsha, qystygúni úı-kúıi joq adamdar jyly úı-jaıǵa ózderi kelip, ornalasýǵa tyryssa, al jazdygúni kerisinshe qolǵa túspeýdi maqsat etedi. Qańǵybastar balkondardyń astynda, qubyrlarda, kópqabatty úılerdiń aýlalarynda, qoqys salatyn baktardyń mańynda túnep, kúneltedi.
Turǵylyqty mekenjaıy joq mas adamdar qoǵamdyq tártipti buzyp qana qoımaı, qalalyqtardyń densaýlyǵyna qaýip tóndiredi. Polıtseılerdiń mobıldi toby kún saıyn olardy jınap, qabyldaý-taratý ornyna jetkizedi.
«Foto-vıdeo esepter, saýsaq izderin alý, izdeýdegi qylmyskerler men iz-tússiz joǵalǵandar bazalary boıynsha tekserý – úı-kúıi joq adamdarmen júıeli jumys jıi naqty nátıje beredi. «Turǵylyqty mekenjaıy joq tulǵa» úsh kúndik jedel-profılaktıkalyq is-sharasy barysynda urlyq pen buzaqylyq jasady degen kúdikpen izdeýde júrgen eki qańǵybas anyqtaldy. Ekeýi de qalalyq polıtsııa basqarmasynyń tergeý bólimine tapsyryldy», - deıdi Petropavl qalalyq PB qabyldap-taratý ornynyń bastyǵy Adaı Smaıyl.
Jalpy, «Turǵylyqty mekenjaıy joq tulǵa» is-sharasyn ótkizý nátıjesinde úsh kún ishinde qabyldaý taratý ornyna 217 adam jetkizildi, 14 adam «Turǵylyqty mekenjaıy joq tulǵa» sanaty boıynsha qamaldy. 366 adamǵa daktıloskopııa jasaldy, foto esepke 271 adam, vıdeo esepke 315 adam qoıyldy.
