Petropavlda úsh aıda beınekameralar 4 myńǵa jýyq jol erejesin buzýshylyqty tirkegen
PETROPAVL. QazAqparat – Petropavlda ıntellektýaldy beınekameralardyń kómegimen jyl basynan 4 myńǵa jýyq jolda júrý erejesin buzý deregi anyqtaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavl kóshelerinde beınebaqylaýdyń «Integra» jáne «Mıraj» ıntellektýaldy júıesi jumys isteıdi. Oblys ortalyǵyndaǵy 43 beınekamera jolda júrý erejesin buzý jaǵdaılaryn avtomatty túrde tirkeıdi. Abaı-N.Nazarbaev, Internatsıonal-Jambyl, Internatsıonal-Astana kósheleriniń qıylysynda ornalasqan qondyrǵy baǵdarshamnyń ruqsat etilmegen túsine jáne toqtaý syzyǵynan ótkenderdi anyqtaıdy. Al Jambyl-Partızan, Ǵ.Músirepov-Jambyl, N.Nazarbaev- Internatsıonal jáne M.Jumabaev-K.Sútishev kósheleriniń qıylysynda turǵan beınekameralar jyldamdyqty asyrǵandardy tirkeıdi.
«Petropavlda sońǵy 3 aıda ıntellektýaldy baqylaý júıesi qondyrǵylary arqyly 3627 jolda júrý erejesin buzý jaǵdaıy tirkeldi.
Qazirgi kezde júrgizýshiler eń jıi jol beretin ereje buzýshylyq – ol toqtaý syzyǵynan ótip ketý. Beınebaqylaý júıesi arqyly kólik ıelerine kóptegen aıyppul salyndy. Jalpy kóshe qıylysynan abaılap ótken jón.
Asyǵystyqtyń sońy ókinishke ákelýi múmkin», - deıdi SQO PD ákimshilik polıtsııa basqarmasynyń bastyǵy Bolat Jeksembınov.
Polıtseıdiń aıtýynsha, jyl basynan beınebaqylaýdyń kómegimen jyldamdyqty asyrǵan 59 júrgizýshi anyqtalyp, jazaǵa tartyldy. Qazir naǵyz qaýipti kezeń – aýa raıy qubylmaly, ári mektepterde tórtinshi toqsan dástúrli túrde bastaldy. Sondyqtan jolda júrý erejesin buzbaı, ásirese qarbalas sátte abaı bolǵan jón.
