Petropavlda úsh adamnyń qanyn moınyna júktegen er adamǵa sot úkimi shyqty

PETROPAVL. KAZINFORM – Petropavlda áıeli men ógeı balasyn jáne inisin óltirip, órtedi dep aıyptalǵan Aleksandr Kanışev sottaldy.

Soltústik Qazaqstan oblystyq qylmystyq ister jónindegi mamandandyrylǵan aýdanaralyq sotta bul is alqabılerdiń qatysýymen qaralyp, búgin er adamǵa ómir boıyna bas bostandyǵynan aıyrý jazasy kesildi. Aleksandr Kanışev sot zalynda ózin vıdeo, fotoǵa túsirýge ruqsat bermedi.

- 1998 jyly týǵan, SQO týmasy, nekede turmaǵan, orta bilimi bar, ártúrli jumys istegen Aleksandr Kanışev QR QK 99-baby 2-bóliginiń 1, 3, 5-tarmaqtary (Eki nemese odan da kóp adamdy óltirý, kináli adamǵa dármensiz kúıde ekeni kórineý belgili adamdy óltirý jáne aıryqsha qatygezdikpen óltirý) jáne QR QK 99-babynyń 3-bóligi (Jas balany óltirý) QR QK 191-babynyń 1-bóligi (Tonaý) boıynsha kináli dep tanylyp, ómir boıyna bas bostandyǵynan aıyrý túrindegi jaza taǵaıyndalsyn. Buǵan deıingi eshqaıda ketpeý týraly qolhat túrindegi shekteýdiń ornyna ol sot zalynda qamaýǵa alynyp, jazasyn qylmystyq atqarý júıesiniń tótenshe qaýipsiz mekemesinde óteıtin bolady. Sondaı-aq, jazasyn óteý ornynda maskúnemdikten emdeledi. Budan bólek Kanışevten sot saraptama shyǵyndaryn – 2 mln 748 myń teńge jáne zardap shegýshilerge 30 AEK nemese 118 myń teńge ótemaqy óndirilsin, - dedi SQO qylmystyq ister jónindegi mamandandyrylǵan aýdanaralyq sotynyń sýdıasy Erlan Nursháripov.

Esterińizge salaıyq, oqıǵa 2023 jyldyń qyrkúıeginde bolǵan. Kanışev anasynyń úıinde ózimen azamattyq nekede birge turatyn kelinshekpen janjaldasyp, ony óltirýge nıettenedi.

Aıyptaý qorytyndysy boıynsha, Kanışev áıeliniń kishkentaı qyzyn kóterip, óz boıymen birdeı bıiktikten kireberistiń edenine alyp urǵan. Alǵan jaraqattarynan bala sol jerde qaıtys boldy. Ári qaraı ol áıeldiń qylmystyq jaýapkershilikke tartamyn degen qoqan-loqysynan qorqyp, ony óltirý úshin aýzy-murnyn jaýyp, tunshyqtyrǵan. Esinen tanyp qalǵan kelinshekti óldi dep oılaǵan. Budan keıin oqıǵaǵa kýáger kámelet jasyna tolmaǵan inisin de tunshyqtyryp óltiredi.

Kanışev úsh adamnyń ólimin jazataıym oqıǵa retinde kórsetip, óz qylmysyn jasyrý maqsatynda kireberis bólmege ot qoıǵan. Saldarynan áıel ıis tıip, ýlanyp kóz jumdy. Kanışev órtke qatysy joqtyǵyn kórsetý úshin úıdiń terezesin syndyryp shyǵyp, kómekke shaqyra bastaǵan.

Tergeý barysynda onyń 2021 jyly Petropavlda páterlerdiń birinde týǵan kúnde bolyp, tanysynyń kýrtkasynyń qaltasynan 20 myń teńge aqshasy bar ámııandy urlap ketkeni de anyqtaldy.

Al byltyr kúzde alqabıler alqasynyń úkimimen Kanışev kinásiz dep tanylyp, sot zalynan bosatylǵan edi. Prokýrorlardyń appelıatsııalyq shaǵymynan keıin is qaıta qaraldy.

Sot úkimi áli zańdy kúshine engen joq.

Buǵan deıin Petropavldaǵy Baıbolov kóshesi 51-úıdiń turǵyndary baspanalarynyń qazirgi jaǵdaıyna shaǵymdanyp, kómek suraǵanyn jazǵan edik.