Petropavlda úsh adamdy úsik shalǵan
PETROPAVL. QazAqparat - Qalalyq travmpýnktke úsik shalǵan úsh petropavldyq júgingen, dep habarlady densaýlyq saqtaý basqarmasynyń baspasóz qyzmetine silteme jasap «QazAqparat» HAA tilshisi.
Oblystyń TJD aqparatyna sáıkes aldaǵy eki kúnde SQO-da aýa raıyna baılanysty eskertý jarııalandy. «Qazgıdromet» RMK derekterine sáıkes 22 jáne 23 jeltoqsan kúni túnde óńirde kúshti aıaz bolady, keı jerlerde aıaz - 40 gradýsqa deıin jetedi.
«TJD halyqtyń qalypty tynys-tirshiligin qamtamasyz etý, TJ aldyn alý úshin sharalar qabyldaýdy usynady», - delingen habarlamada. Oblysta búgin de aıaz boldy.
Petropavlda aýa raıy mınýs 38 gradýsqa deıin tústi. Keı aýdandarda - 42 gradýsqa deıin tómendedi. Mektepterde sabaq keıinge qaldyryldy. Túnde barlyq baǵyt boıynsha jol jabyldy.
