Petropavlda urylar páterden 6 mln teńgeni urlap ketti
PETROPAVL. QazAqparat – Petropavlda urylar jergilikti kásipkerdiń páterine túsip, qomaqty soma – 6,5 mln teńgeni qoldy etti. Polıtseıler osy qylmysqa kúdiktilerdi ustap, urlanǵan aqshanyń bi bóligi qaıtaryldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, 31 naýryz kúni Petropavl qalasynyń 1958 jyly týǵan turǵyny páterine ury túskenin habarlady. Belgisiz bireýler olardyń úıde joqtyǵyn paıdalanypty. Páterin keletin kiltpen ashqan urylar seıfti buzyp, kásipkerdiń taýar satyp alýǵa jınaǵan aqshasyn urlap ketken. Shyǵyn 6,5 mıllıon teńgeni qurady. Atalǵan fakti «Urlyq» baby boıynsha Sotqa deıin tergep-tekserýdiń biryńǵaı tizilimine engizildi.
Qaskóıler eshqandaı iz qaldyrmaǵan. Soǵan qaramastan, SQO PD Krımınaldyq polıtsııa basqarmasy men Petropavl qalasy PB krımınaldyq polıtsııa bóliminiń qyzmetkerleri aıǵaqtardy muqııat zerttep, eki kúdiktini anyqtady. Olardyń biri - buryn buzaqylyq jasaǵany úshin sottalǵan 29 jastaǵy petropavldyq bolsa, ekinshisi tonaý úshin jazasyn ótegen 42 jastaǵy Qyzyljar aýdanynyń turǵyny eken. Kúdiktiler ýaqytsha ustaý ızolıatoryna qamaýǵa alyndy. Urlanǵan qarajattyń bir bóligi qaıtaryldy.
«Qazirgi ýaqytta qylmystyń mán-jaıyn anyqtaýǵa baǵyttalǵan sotqa deıingi tergeý júrgizilip, is boıynsha qosymsha aıǵaqtar jınalyp jatyr. Páter urlyǵynyń aldyn alý úshin kúzet agenttikterimen kelisim jasap, dabylqaqqyshtar ornatyp, kireberisterdi beınebaqylaý kameralarymen jabdyqtaǵan jón. Sonymen qatar, páterlerdiń qulyptaryn muqııat tańdaý kerek», - deıdi SQO PD bastyǵynyń orynbasary Rýslan Nazarov.
SQO-da jyl basynan 240 páter urlyǵy tirkeldi. Búginge deıin onyń 204-i ashylǵan.
