Petropavlda ury bir úıdi eki ret tonap, qolǵa tústi
PETROPAVL. QazAqparat – Petropavlda bes jyl buryn tonaǵan úıine taǵy da urlyqqa túsken uryny polıtseıler alysqa uzatpaı ustady, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, úıine kelgen Petropavldaǵy Jumysshy kentiniń turǵyny terezesiniń synǵanyn kórgen.
Ury baǵaly zattardy izdep, úıdiń astan-kestenin shyǵarypty.
Polıtseıler osyǵan uqsas qylmystardy jasaǵany úshin buryn birneshe ret sottalǵan 45 jastaǵy qala turǵynyn ustady.
Urlanǵan zattar onyń páterinen, al altyn lombardtan alyndy. Kelgen shyǵyn mólsheri 200 myń teńge shamasynda.
Polıtseılerdiń aıtýynsha, qylmysker 2016 jyly da ol úıge urlyqqa túsip, ustalǵan edi. Sol joly 2 jylǵa bas bostandyǵynan aıyryldy.
2018 jyly bosap shyqqannan keıin, eki aptadan soń páter urlyǵyn jasap, taǵy 2 jyl 5 aı merzimge sottaldy.
Bosap shyqqanyna bir aı óter-ótpesten qaıta qylmysqa baryp otyr.
«Jigit kúdiktiler tizimine alǵashqylardyń biri bolyp túsken. Sebebi, buryn isti bolǵan tulǵalar erekshe baqylaýǵa alynady. Uqsas qylmystar jasalǵan kezde bul adamdar birinshi bolyp tekseriledi. Urydan qorǵaný úshin keter aldynda páterdiń esigin tekserip, úı áınekterin ashyq qaldyrmaýǵa jáne de múmkindiginshe dabyl qondyrǵylaryn ornatýǵa, aýlalar men páter podezderine beınebaqylaý ornatýǵa keńes beremiz», - deıdi SQO PD krımınaldyq polıtsııa basqarmasynyń asa mańyzdy ister boıynsha aǵa jedel ýákili Danııar Ǵalıaqparov.
Jalpy bıyl 196 páter urlyǵy tirkelse, sonyń 120-sy boıynsha is sotqa jiberildi.
