Petropavlda ury áıeldiń qolynan 4 mln teńgesi bar paketti julyp áketti
PETROPAVL. QazAqparat – Petropavlda polıtseıler áıeldiń 4 mln teńge salynǵan paketin ala qashqan uryny alysqa uzatpaı ustady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, oqıǵa 22 shilde kúni saǵat 10.00 shamasynda «Korona» saýda úıiniń mańynda bolǵan. Ury Petropavl turǵynynyń qolynan aqsha salynǵan paketti julyp alyp, úılerdiń arasymen qasha jónelgen.
Abdyrap qalǵan áıeldiń kómek suraǵan daýsyn patrýldi polıtseıler estıdi. Aýlalardyń birinde jasyrynbaq bolǵan urynyń sońyna túsedi. Qýǵynshyny baıqaǵan qaskóı qolyndaǵy paketin laqtyra salyp, jasyrynbaq boldy. Alaıda, polıtsııa qyzmetkeri qýyp jetip, ony kelgen jedel-tergeý tobyna tapsyrdy. 4 mln aastam teńge bolǵan paket ıesine qaıtaryldy.
«Men abyrjyp qaldym. Ury men polıtseılerdiń sońynan júgire ketippin. Keıin polıtsııaǵa habarlasý kerek qoı dep oıladym. Keri júgirdim. Ótip bara jatqan áıelder polıtsııaǵa habarlasýǵa járdemdesti. Polıtseılerge alǵysym sheksiz», - dep qala turǵyny óz rızashylyǵyn bildirdi.
Tonaý deregi boıynsha sotqa deıingi tergeý júrip jatyr. Ustalǵan kúdikti - 34 jastaǵy Petropavl turǵyny. Buryn birneshe ret sottalǵan eken.
