Petropavlda ýrbanıstıka departamenti quryldy: ol nemen aınalysady
PETROPAVL. KAZINFORM – Petropavlda qalanyń sáýleti men kelbetine jaýap beretin jańa qurylym paıda boldy.
Ýrbanıstıka departamenti tamyz aıynda «Soltústik» áleýmettik-kásipkerlik korporatsııasynyń quramynda jumysyn bastap ketti. Jańa qurylymnyń dırektory bolyp Rınat Djýasbaev taǵaıyndaldy. Shtatta bes adam eńbek etedi.
Departamentke óńirdegi ýrbanıstıka máselelerimen júıeli túrde jumys isteý mindettelgen, ıaǵnı Petropavldyń ǵana emes, oblystaǵy Taıynsha, Sergeevka, Mamlıýtka jáne Býlaevo qalalarynyń da sáýlettik kelbetin qalyptastyryp, ony zamanaýı talaptarǵa sáıkestendirýi qajet.
Qazir departament Petropavldyń bıyl bekitilgen dızaın-kodymen jumysty bastap ketti.
- Dızaın-kod qaladaǵy ǵımarattardyń qasbeti, mańdaısha-jazýlar, tús úılesimi, kógaldandyrý, jaryqtandyrý, kóshe jıhazy men abattandyrý elementterine qoıylatyn ortaq talaptardy belgileıdi. Osynyń báriniń ortaq bir qaǵıdaǵa saı qalyptasýy. Bul ásirese ortalyq kóshelerdegi ǵımarattardyń syrtqy kelbeti, jarnamalar men mańdaıshalardyń ornalasýy, kóshelerdiń jaryqtandyrylýy men kógaldandyrylýyna qatysty, - deıdi Rınat Djýasbaev.
Mamannyń aıtýynsha, búginde Petropavldyń dızaın-kodyn is júzinde engizý joldary pysyqtalyp jatyr. ıAǵnı, normatıvtik-quqyqtyq qujattarda mindetti talap retinde bekitý, kásipkerlerge beıimdelý kezeńin berý jáne talapqa saı kelmeıtin nysandarǵa qatysty sharalar qoldaný. Bul qala qyzmetteri men bıznes arasyndaǵy jumysty bir júıege keltirýge baǵyttalǵan.
Jaqynda Ýrbanıstıka departamenti saraptamalyq, ádistemelik jáne jobalyq qoldaý kórsetý úshin Astanadaǵy Ýrbanıstıka ortalyǵynyń beıindi sarapshylaryn tartý jóninde aldyn ala kelissózder júrgizdi.
- Óńirde turǵyn úı qoryn jańartý máselesi de qarastyrylyp jatyr. Oblystyq máslıhattyń sessııasynda Soltústik Qazaqstan oblysynyń 2026–2029 jyldarǵa arnalǵan turǵyn úıdi renovatsııalaý baǵdarlamasy bekitildi. Bul qujat apatty jaǵdaıda turǵan baspanalardy buzyp, turǵyn úı ıelerin jańa pátermen qamtamasyz etýdi kózdeıdi. Qazirgi ýaqytta málimetter naqtylanyp jatyr, - deıdi departament basshysy.
Buǵan deıin Prezıdent astanalyq Ýrbanıstıka ortalyǵynyń tájirıbesin óńirlerge taratý qajettigin aıtqanyn jazǵan edik.
