Petropavlda ulttyq joba aıasynda keler jyly 4 mekteptiń qurylysy bastalady
Soltústik Qazaqstan oblysy ákimdiginiń málimetinshe, «Jaıly mektep» ulttyq jobasy Prezıdenttiń tapsyrmasymen jasaldy. Onyń aıasynda Petropavldaǵy Kopaı shaǵynaýdanynda 1200 oryndyq, Jas órken shaǵynaýdanynda 900 oryndyq, Orman men Berekede árqaısy 600 oryndyq – barlyǵy 4 bilim ordasynyń qurylysy bastalmaq. Osylaısha eki aýysymda ol jerde 6 myńnan astam bala bilim alady.
«Ulttyq joba aıasynda salynatyn mektepterdiń qurylysy keler jyly bastalady. Ol nysandar jańa talapqa saı bolady. Máselen, birneshe sport zaly, úlken ashanalary qarastyrylǵan jáne zamanaýı oqý qondyrǵysymen jaraqtandyrylady», - dedi SQO ákiminiń orynbasary Sátjan Ablalıev.
Qazir SQO-nyń Taıynsha aýdanynda 600 oryndyq jáne Vınshnevka eldi mekeninde 120 balaǵa shaqtalǵan eki mekteptiń qurylysy júrip jatyr.
Petropavldaǵy Bereke shaǵynaýdanynda pılottyq joba – 300 oqý jáne 50 jatyn orny bar korrektsııalyq mektep salynyp jatyr.
«Іske asqan jobalardyń biri – M.Qozybaev atyndaǵy Soltústik Qazaqstan ýnıversıtetiniń oqý-zerthanalyq korpýsy. 18 700 sharshy metrdi alatyn 11 qabatty nysanda túrli sala boıynsha 68 zerthana bar.
Stýdentter arasynda jataqhana jetispeýshiligi máselesin sheshý maqsatynda 12 qabatty 1200 oryndyq jataqhana salynyp jatyr. Ol 2023 jyldyń sońynda paıdalanýǵa beriledi.
Eki 9 qabattyq, 488 oryndyq jataqhana sport kolledjine jáne ýnıversıtetke salynyp jatyr», - dedi Sátjan Ablalıev.