Petropavlda ultaralyq alaýyzdyqty qozdyrǵan adam psıhıatrııalyq statsıonarda májbúrlep emdeledi

PETROPAVL. QazAqparat – Petropavlda áleýmettik jeli arqyly ultaralyq alaýyzdyqty qozdyrǵan er kisiniń isi sotta qaraldy. Mamandar onyń esi durys emestigin anyqtady. Sottyń úkimimen ol endi psıhıatrııalyq aýrýhanada em qabyldaıdy, dep habarlaıdy QazAqparat tilshisi.

Petropavl qalalyq sotynyń málimetinshe, 4 tamyzda Petropavl qalalyq soty ultaralyq alaýyzdyqty qozdyrý, azamattardyń ulttyq ar-ojdany men qadir-qasıetin qorlaý, sondaı-aq Qazaqstan Respýblıkasynyń tutastyǵyn buzýǵa jarııa túrde shaqyrý baby boıynsha L.-ǵa qatysty isti qarady.

Er adam 2014 jyldan 2022 jylǵa deıingi kezeńde uıaly telefon arqyly «Facebook» áleýmettik jelisinde qazaq, orys ult ókilderiniń arasynda alaýyzdyqty qozdyrýǵa baǵyttalǵan reposttar men pikirler jarııalap otyrǵan. Sondaı-aq el tutastyǵyn buzýǵa shaqyrǵan jazbalar jazǵan, osylaısha jeli qoldanýshylary arasynda negatıv týdyrǵan. Keıin onyń aýyratyndyǵy, bul jazbalardy jazǵan ýaqytta esi durys emes kúıde bolǵandyǵy anyqtalǵan.

Prokýror L.-dy QR QK 174-babynyń 1-bóligi, 180-babynyń 2-bóliginde kórsetilgendeı - qoǵamdyq qaýipti áreketterdi esi durys emes kúıde jasaǵany úshin qylmystyq jaýaptylyqtan bosatyp, jalpy úlgidegi psıhıatrııalyq statsıonarda májbúrlep emdeý túrindegi sharany qoldanýdy surady.

Psıhıkalyq kúıine baılanysty, L. sot otyrysyna qatysqan joq.

Sot L.-diń zańmen tyıym salynǵan áreketterdi esi durys emes kúıde jasaǵany dáleldendi dep tanyp, jalpy úlgidegi psıhıatrııalyq statsıonarda májbúrlep emdeý túrindegi medıtsınalyq sıpattaǵy májbúrleý sharasyn qoldandy. ıAǵnı qylmystyq jaýaptylyqtan bosatty.