Petropavlda Ulystyń uly kúnine oraı respýblıkalyq aqyndar aıtysy ótti
PETROPAVL. KAZINFORM – Petropavlda «Bereke basy – Naýryz» atty respýblıkalyq komandalyq aıtys ótti.
«AMANAT» partııasy Soltústik Qazaqstan oblystyq fılıalynyń málimetinshe, is-sharany oblys ákimdigi jáne Aıtys aqyndary men jyrshy-termeshilerdiń halyqaralyq odaǵy uıymdastyrdy.
Aıtys dodasynda Soltústik Qazaqstan jáne Shyǵys Qazaqstan oblystarynyń aqyndary men dástúrli óner sheberleri baqtaryn synady. Bul - óńirler arasyndaǵy shyǵarmashylyq baılanysty nyǵaıtý, qazaq ónerin ulyqtaý jáne ulttyq mádenı muramyzdy nasıhattaý maqsatynda uıymdastyrylǵan.
Aıtysty QR Parlamenti Májilisiniń depýtaty, Qazaqstannyń eńbek sińirgen qaıratkeri Amanjol Áltaı júrgizdi.
- Aıtys – halyqtyń jan dúnıesin tereńnen tolǵaıtyn, ulttyq rýhyn aıshyqtaıtyn erekshe óner. Búgingi is-shara aqyndardyń sheshendik sheberligin shyńdap qana qoımaı, halqymyzdyń rýhanı tutastyǵyn bekemdeı túsedi. Ulystyń uly kúnine oraı uıymdastyrylǵan bul doda – barshamyz úshin máni zor oqıǵa. Aqyndarǵa shabyt pen sáttilik tileımin! Sóz marjanyn terip, ulttyq ónerimizdiń mártebesin asqaqtata berińizder», – dedi oblys ákiminiń orynbasary Júsip Jumaǵulov.
Qazaqstannyń eńbek sińirgen qaıratkeri Júrsin Erman bastaǵan qazylar quramyna tanymal aıtysker aqyn Serik Qalıev, QR Mádenıet jáne aqparat mınıstrliginiń ókili Rıga Onaeva, jyraý-ǵalym Almas Almatov, kúıshi Janǵalı Júzbaev jáne dástúrli ánshi Aıtbek Nyǵyzbaev kirdi.
Qos óńir arasynda ótken óner báıgesinde aqyndar «túre», «súre», «qaıym» jáne «qyz ben jigit aıtysy» janrlary boıynsha synǵa tústi. Dodanyń qorytyndysy boıynsha SQO komandasy bas júldeni jeńip alyp, respýblıkalyq aıtystyń kelesi kezeńine joldama aldy. Jeńimpaz komanda múshelerine aqshalaı syıaqy tabystaldy: ár aqynǵa 500 myń teńgeden, al jyrshy, termeshi, dástúrli ánshi jáne kúıshilerge 250 myń teńgeden berildi.
Kelesi týrda jeńimpazdar Astana komandasymen kezdesedi.
Buǵan deıin SQO-da mýzeıge kirý qaıtadan aqyly bolǵanyn jazǵan edik.