Petropavlda «Uly Jeńistiń qadamy» atty kórme ashyldy
PETROPAVL. KAZINFORM – Kórme Jeńistiń 80 jyldyǵyna oraı Soltústik Qazaqstan oblystyq tarıhı-ólketaný mýzeıinde jumys istep jatyr.
Kelýshilerdiń nazaryna Otan soǵysynyń batyrlary týraly mol málimet, qujattar, fotolar, maıdangerlerdiń ustaǵan jeke zattary, qarý-jaraq jáne fashısterden alynǵan trofeı buıymdar qoıyldy.
Jádigerlerdiń basym kópshiligin soǵys ardagerleriniń týǵan-týystary ákelip tapsyrǵan. Máselen, 858-shi artıllerııalyq polk batareıasynyń komandıri Ivan Prıadkonyń soǵysta túsken fotosyn, tapansha qabyn, syıǵa alǵan qalta saǵatyn jáne eń qundy jádiger – qol oramalyn kórýge bolady. «Vanıýsha, vozvraşaısıa s pobedoı» dep anasy kestelep jazǵan oramaldy ol soǵys boıy jan qaltasynan tastamaǵan eken.
Mýzeıge sońǵy tapsyrylǵan qujattardyń biri – jaýynger Fılıpp Eltsovqa qatysty.
- Novgorod jerinde 80 jyldan keıin onyń súıegi, jeke zattary, jaýyngerlik medalony tabyldy. Qujattaryndaǵy jazýdan onyń aty-jónin, Soltústik Qazaqstan oblysynan ekenin oqý múmkin bolyp, bul jaqta týystary tabyldy. Olar bul qundy dúnıeni bizge ákelip berdi.
Jalpy bul kórmege 400-den astam fotografııa qoıyldy. Onyń 130-y buryn eshqaıda kórsetilmegen jańa sýretter, - deıdi mýzeı qyzmetkeri Vera Andreeva.
SQO ardagerler keńesi tóraǵasynyń orynbasary Anatolıı Korabelnıkovtyń aıtýynsha, soǵys jyldary SQO-dan maıdanǵa naqty qansha adam ketkendigi týraly áli kúnge deıin naqty aqparat joq.
- 29 tomdyq kitap shyqty, biraq oǵan maıdannan aman-esen oralǵandardyń 30% da jazylmaǵan. Nelikten? Zerttelmeı jatyr. Týǵan-týystary, ólketanýshylar at salysýy kerek edi. Bizdiń oblys aýmaǵyna eldi mekender birese qosyldy, birese alyndy. Munyń bári statıstıkaǵa áser etti. Meniń zertteýimshe, soǵysqa 145 myńnan astam soltústikqazaqstandyq attandy. Onyń 72 myńy aman oraldy, - deıdi Anatolıı Korabelnıkov.
Esterińizge salaıyq, buǵan deıin Petropavl qalasyna «Eńbek dańqy qalasy» qurmetti ataǵyn berý úshin qujattar ázirlenip jatqanyn jazǵan edik. Elimizde bul ataqty Astana, Almaty jáne Qaraǵandy qalalary bıyl aldy.
