Petropavlda ýly sańyraýqulaqty jep kórmek bolǵan áıel jansaqtaý bóliminen bir-aq shyqty
PETROPAVL. KAZINFORM — Petropavl qalalyq kópbeıindi jedel medıtsınalyq kómek aýrýhanasyna 40 jastaǵy áıel aýyr jaǵdaıda jetkizildi.
Dárigerlerdiń aıtýynsha, naýqastyń jaǵdaıy aýyr, qylyǵy oǵash bolǵan. Áıel medıtsınalyq kómekke júginer aldynda shybyjut-«mýhomor» jegenin aıtqan.
Qajetti medıtsınalyq tekserýlerden keıin patsıent shuǵyl túrde jansaqtaý bólimine jatqyzyldy. Oǵan «belgisiz zatpen jedel ýlaný» dıagnozy qoıyldy. Sonymen qatar, odan qosymsha aýrýlar men táýeldilik sındromy anyqtalǵan.
Naýqastyń ómirin saqtaý úshin reanımatsııa dárigerleri tórt kún boıy qarqyndy em júrgizdi. Mamandar aǵzanyń ómirlik mańyzdy qyzmetterin turaqtandyrýǵa, ýlanýdan týyndaǵan buzylystardy túzetýge jáne yqtımal asqynýlardyń aldyn alýǵa baǵyttalǵan em qoldandy. Patsıenttiń jaǵdaıy men negizgi kórsetkishteri medıtsınalyq qyzmetkerlerdiń turaqty baqylaýynda boldy.
Jaǵdaıy turaqtanǵannan keıin áıel terapııa bólimine aýystyrylyp, emin ári qaraı jalǵastyrdy.
Emdeý nátıjesinde patsıenttiń jaǵdaıy jaqsaryp, aýrýhanadan shyǵaryldy. Dárigerler oǵan ári qaraı psıhıatr men narkologtyń mamandandyrylǵan kómegine júginýdi usyndy.
Mamandar ýly sańyraýqulaq jáne sanany ózgertý maqsatynda qoldanylatyn basqa da ósimdikter men zattardyń qaýipti ekenin eskertedi. Mundaı zattardyń adam aǵzasyna áserin aldyn ala boljaý qıyn. Ásirese belgisiz zattardy, dári-dármekterdi nemese olardyń túrli qospalaryn qoldaný aýyr zardaptarǵa ákelýi múmkin.
Ýlaný kezinde adamnyń sanasy buzylyp, qurysý, tynys alýdyń qıyndaýy, júrek-qantamyr júıesi jumysynyń buzylýy sııaqty qaýipti jaǵdaılar týyndaýy yqtımal. Keıbir jaǵdaılarda mundaı ıntoksıkatsııa ómirge qaýip tóndirip, qaıǵyly jaǵdaıǵa ákelýi múmkin.
Buǵan deıin Qazaqstanda bıyl toptyq taǵamnan ýlaný derekteri boıynsha 8 qylmystyq is qozǵalǵanyn jazǵan edik.
