Petropavlda «Uly dala kerýeni» atty halyqaralyq kóshpeli kórme jumys istep jatyr
PETROPAVL. KAZINFORM – Petropavldaǵy «Botaı» ART-galereıasynda ashylǵan kórme keıin basqa óńirlerde jáne Uly jibek joly boıyndaǵy túrki elderinde jurt nazaryna usynylmaq.
Uıymdastyrýshylardyń aıtýynsha, «Uly dala kerýeni» kórmesiniń maqsaty - qazaqstandyq qylqalam sheberleri men sheteldik sýretshilerdiń tájirıbe almasýyna jaǵdaı jasaý jáne tarıhymyzǵa, salt-dástúrimizge qyzýǵyshylyq oıatý.
- Búkil dúnıejúzi «Botaı» mádenıetin bilsin, qazaq halqynyń tarıhy tereńde jatqanyn tanysyn dep uıymdastyryp jatyrmyz. Qazaqstandaǵy myqty sýretshilerdiń basyn qosyp otyrmyz. Ártúrli tehnıkada jumys isteıtin sheberler kóp. Basqa qalalardan da sýretshiler qosylyp, jaqsy degen jumystaryn usynady dep oılaımyn, - deıdi ıÝNESKO janyndaǵy Halyqaralyq plastıkalyq óner qaýymdastyǵynyń múshesi Aıtkúl Tasmaǵambetova.
Petropavlda ótip jatqan kórmege úsh sýretshi - Baqytnur Býrdesbekov, Aıtkúl Tasmaǵambetova jáne Ádilǵalı Baıandınniń 80-nen astam týyndysy qoıyldy.
- Ártúrli taqyrypta 25 jumysymdy ákeldim. Qyz balanyń, áıeldiń beınesi jumystarymda kórsetilgen. Sonyń biri – «áıel baqyty» dep atalady. Tııanaqty izdenisten týdy, óıtkeni áıel baqyty, ol eldiń baqyty dep oılaımyn. Sondaı-aq tarıhı taqyryptaǵy jumystarym da bar. «Kúres» dep atalatyn týyndyǵa erekshe toqtalǵym keledi. Eki jigittiń at ústindegi kúresi. Jalpy jylqyǵa qatysty birneshe eńbegim bar. Botaı – jeti qazynanyń biri – jylqynyń alǵash ret qolǵa úıretilgen jeri ǵoı. Osy ıdeıalarymyzdy Qyzyljar jerine ákelip, kórme uıymdastyryp jatyrmyz, - deıdi QR Sýretshiler odaǵynyń múshesi Ádilǵalı Baıandın.
Sýretshiniń aıtýynsha, kórmege qyzyǵýshylyq joǵary. Máselen, Ázerbaıjannan, Baký qalasyndaǵy Geıdar Alıev mýzeıinde kórme uıymdastyrý usynysy túsken. Jalpy jospar boıynsha «Uly dala kerýeni» halyqaralyq kóshpeli kórmesi Qyrǵyzstan, Ózbekstan, Ázerbaıjan, Túrkııa men Qytaıda da ótkizilmek. Al Petropavlda eki aı jumys isteıdi.
Buǵan deıin SQO-daǵy aýyl mýzeıleriniń qazirgi jaǵdaıy týraly jazǵan edik.
