Petropavlda ýchaskelik polıtsııa ınspektorlaryna jańa qyzmettik kólik tabys etildi
PETROPAVL. QazAqparat – Petropavldaǵy №1 ýchaskelik polıtsııa pýnktiniń qyzmetkerlerine jańa «Lada Vesta» avtokóligi tabystaldy, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, Memleket basshysynyń qatysýymen ótken vedomstvo alqasynyń sońǵy otyrysynda QR Іshki ister mınıstri Erlan Turǵymbaevtyń qoıǵan mindetterin júzege asyrý aıasynda QR Іshki ister mınıstrligi ýchaskelik polıtseılerge avtokólik bóldi.
«Materıaldyq-tehnıkalyq bazany nyǵaıtý árqashan halyqpen baılanystaǵy qyzmetkerler jumysynyń tıimdiligin arttyrýǵa septigin tıgizedi. Jedel áreket etýge jaǵdaı jasaý - azamattardyń qaýipsizdigin qamtamasyz etýge zor úles qosý», - deıdi tártip saqshylaryna «Lada Vesta» avtokóliginiń sertıfıkaty men kiltin tabys etken SQO Polıtsııa departamentiniń bastyǵy Marat Tólebaev.
Petropavldaǵy №1 ÝPP ýchaskelik polıtsııa ınspektorlary qalanyń 24 myń adam turatyn ortalyq bóligine qyzmet kórsetedi. Bul - birneshe kóńil kóterý orny, jańa salynǵan úıler men jer úıleri, sporttyq nysandary bar iri aýdandardyń biri. Soǵan qaramastan ol óńirdegi úlgili ýchaskelik polıtsııa pýnktteriniń qatarynda. Qalanyń basqa da ýchaskelik polıtsııa pýnktteri sııaqty planshettermen, aýlalarǵa jáne basqa da qoǵamdyq oryndarǵa shyǵarylǵan beınebaqylaý kameralarymen jabdyqtalǵan.
«Men kóp jyldan beri ýchaskelik polıtsııa qyzmetkeri bolyp eńbek etemin. Jańa kólik bizdiń jumysymyzdy jeńildetip, shaqyrtýlarǵa jedel jetýge kómektespek», - dedi aǵa ýchaskelik ınspektor Dýlat Janybekov.
Petropavlda 13 ýchaskelik polıtsııa pýnkti bar, onda 90-nan astam ýchaskelik polıtsııa ınspektory jumys isteıdi. Qazir Prezıdent Joldaýyn iske asyrý aıasynda ýchaskelik polıtsııa qyzmetkerleriniń mártebesin kóterý, olardyń ókilettikterin keńeıtip, materıaldyq-tehnıkalyq jaǵdaılaryn jaqsartý boıynsha jumystar júrgizilip jatyr.
