Petropavlda ýchaskelik polıtseıler jalǵyzbasty 900-den astam zeınetkerdi anyqtady
SQO Polıtsııa departamenti baspasóz qyzmetiniń málimetinshe, qyrkúıektiń 7-si men jeltoqsannyń 1-i aralyǵynda ótken «Ýchaske» jedel-profılaktıkalyq is-sharasy 85 kúnge sozyldy. Osy aralyqta soltústikqazaqstandyq ýchaskelik polıtsııa ınspektorlary óz ákimshilik ýchaskelerindegi úı-úıdi aralady. Operatsııa aıasynda ýchaskelik polıtsııa ınspektory ár úıde, ár páterde bolyp, turǵyndarmen tanysyp, baılanys ornatty.
Tek Petropavl qalalyq Polıtsııa basqarmasynyń qyzmetkerleri ǵana «Ýchaske» is-sharasy barysynda kópqabatty úılerdegi 76 900 páterdi jáne 14 279 jeke menshik úıdi aralaǵan. Nátıjesinde oblys ortalyǵynda 934 zeınetkerdiń jalǵyz turyp jatqandyǵy belgili boldy. Olar alaıaqtar men ınternet-alaıaqtardan zardap shekpeý úshin tártip saqshylary profılaktıkalyq jumystar júrgizildi.
SQO PD bastyǵynyń birinshi orynbasary Qanat Aıtbaevtyń aıtýynsha, ýchaskelik ınspektorlar úshin oblys 289 ýchaskege bólingen, onda 89 myń 800 kópqabatty úı men 12 myń 569 jeke menshik úı ornalastqan.
«Ýchaske» jedel-profılaktıkalyq is-sharasy aıasynda 211 myń 500 astam baspana tekserildi. Turǵylyqty jeri boıynsha ishki ister organdarynyń esebindegi 5 myń 664 adam tekserildi, onyń 862-si túzetý mekemelerinen shartty túrde merziminen buryn bosatylǵandar.
Oblys boıynsha ishki ister organdarynda esepte turǵan 7 myń 553 azamattyq qarý ıesi de tekserildi. Qarýdy saqtaý erejelerin buzýdyń 101 deregi anyqtalyp, 17 myltyq alyndy.
Jalpy operatsııa ótken 85 kún ishinde SQO-da barlyǵy 11 myń 539 ákimshilik quqyq buzýshylyq anyqtaldy, onyń 2 myńnan astamy alkogoldik ishimdik ishý nemese mas kúıde qoǵamdyq oryndarda júrýge qatysty.
«Ýchaske» operatsııasy jylyna bir ret ótedi. Bıyl is-shara aıasynda «tirek» pýnktteriniń mekenjaılary, baılanys telefondary, sondaı-aq ýchaskelik polıtsııa ınspektorlarynyń sýretteri áleýmettik jelilerdegi oblystyq jáne qalalyq polıtsııanyń resmı paraqshalarynda jarııalandy.
