Petropavlda tynyshtyqty buzǵan 19 adam jaýapqa tartyldy
PETROPAVL. QazAqparat – Petropavlda polıtseıler jyldyń alǵashqy bes kúninde 2200-deı qońyraýdy qabyldasa, shamamen ár besinshisinde tártip saqshylarynyń áreket etýine týra kelgen, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, bul kúnderi Petropavlda tártip saqshylary kúsheıtilgen tártipte jumys istep jatyr. Joldar men qala kóshelerindegi qoǵamdyq tártipti patrýldi polıtseıler qadaǵalasa, shaǵyn aýdandardaǵy tynyshtyqqa ýchaskelik polıtsııa ınspektorlary jaýap berdi.
«Petropavlda polıtsııanyń ýchaskelik 13 pýnkti bar. Olarda 90-nan astam ýchaskelik polıtsııa ınspektorlary eńbek etip jatyr. Mereke kúnderi tártip saqshylaryna turmystyq-otbasylyq quqyq buzýshylyqtardyń aldyn alý, qylmysqa jol bermeý mindeti turdy», - deıdi Petropavl qalalyq polıtsııa basqarmasynyń jergilikti polıtsııa qyzmeti bóliminiń basshysy Álibek Ǵabdýllın.
1-5 qańtar aralyǵynda qalalyq polıtsııanyń «102» nómirine 2198 qońyraý túsken. Onyń 458-i boıynsha polıtseıler meken jaıǵa shyǵyp, shara qoldandy.
Tirkelgen quqyqbuzýshylyqtardyń basym bóligi otbasyndaǵy janjalǵa baılanysty. Sondaı-aq spırttik ishimdik iship, birneshe kún shýlaǵan kórshilerinen mezi bolǵan turǵyndar habarlasqan. Nátıjesinde ýchaskelik polıtsııa ınspektorlary tynyshtyqty buzyp, jurttyń mazasyn alǵan 19 adamdy ákimshilik jaýapkershilikke tartty. Aıyppuldyń kólemi – 5 AEK mólsherinde.
Jalpy byltyr tártip saqshylary 1710 adamdy jaýapqa tartsa, onyń 1329-y oblys ortalyǵynyń turǵyndary.
