Petropavlda tutynýshylardy tarazydan jegender anyqtaldy

PETROPAVL. QazAqparat - Syrtqy qaptamada kórsetilgen salmaqty tekserý týraly óńirlik OKQ brıfınginde SQO boıynsha tehnıkalyq retteý departamentiniń bas mamany, baqylaý boıynsha memlekettik ınspektor Aıgúl Qusaıynova málim etti.

Ústimizdegi jyldyń mamyr aıynan 12 saýda kásipornynan satyp alynǵan 49 túrli azyq-túlik, parfıýmerlik-kosmetıkalyq ónimder men halyq tutynatyn taýarlar satyp alynyp, tekserilgen. Memlekettik ınspektor synaqtyń ımportshylardyń qoımalarynda nemese sýpermarkette ótkenin atap ótti. Tekseris kásipkerdiń tikeleı qatysýymen arnaıy qurylǵymen jasaldy. Nátıjesinde 49 taýardyń 18-inde kórsetilgen salmaqtyń saı kelmeıtini anyqtalǵan.

«Bular myna taýarlar: karamel, shıe, tańqýraı dámi bar «Popkorn» - óndirýshi «Sever Logıstık» JShS, Petropavl q.; QR Qaraǵandy q. «DOM company» ólshep, oraǵan «VIP» saýda markasymen shyǵarylatyn bıdaı, júgeri, arpa jarmasy; «Prıpravych» saýda markasynyń dámdeýishteri (lavr japyraǵy, qara burysh, qyzyl burysh, qalampyr, óndirýshi RF Novosibir q. «Proksıma» AQ kompanııasy; «Nejnyı», «Fruttis», saýda markaly ıogýrttar, óndirýshi Máskeý oblysy, Stýpıno q., «Kampına» AQQ, dıstrıbıýter Almaty q. «Green House Best» JShS; «Vesna» dárethanalyq jáne krem-sabyny, Reseı, Samara q.; «ıA ı mama» balalar sabyny, óndirýshi Reseı, Máskeý q., «Svoboda» AQQ; «Rahmet» qanty Almaty q., «Golden Food Company» JShS; «Rýsskıı» qanty, Reseı, Krasnodar ólkesi», - dedi Aıgúl Qusaıynova.

Ótkizilgen tekseris nátıjesinde, ónim satýshylaryna atalǵan taýarlardy satýǵa tıym salynǵany týraly qujat berilip, 0,5 mln teńgeden astam ákimshilik aıyppuldar salyndy.