Petropavlda turmysy nashar 140 otbasy polıtsııa esebinde tur
Soltústik Qazaqstan oblystyq polıtsııa departamenti baspasóz qyzmetiniń málimetinshe, «Zań jáne jasóspirim» operatsııasynyń basty maqsaty – jasóspirimder arasynda qylmystar pen quqyq buzýshylyqtardyń aldyn alý. Іs-sharaǵa bilim berý, kámeletke tolmaǵandardyń isteri jáne olardyń quqyqtaryn qorǵaý jónindegi komıssııa ókilderi jáne volonterler qatysty.
«Jyl basynan beri 95 qolaısyz otbasy esepke qoıyldy. Jalpy, qazir qalalyq polıtsııa basqarmasynda 144 otbasy esepte tur. Olarmen profılaktıkalyq jumys júrgiziledi. Bir kúnde turmysy tómen 82 otbasy turǵylyqty jeri boıynsha tekserildi», - deıdi Petropavl qalalyq polıtsııa basqarmasy ıývenaldyq polıtsııa bólimshesiniń bastyǵy Elmıra Abýsheva.
Іs-shara aıasynda ıývenaldy polıtsııa qyzmetkerleri kún saıyn jasóspirimderdiń kóp shoǵyrlanatyn jerlerinde jáne kóńil kóterý oryndaryna reıdter ótkizdi. Jalǵa alynǵan páterler, dámhanalar, kompıýterlik klýbtar, saýda úıleri – saǵat 23.00-den keıin osy oryndar quqyq qorǵaý organdarynyń erekshe nazarynda bolady. Reıdtik is-sharanyń birinshi kúninde qyzmetkerler túngi qalada júrgen kámeletke tolmaǵan 13 balany úılerine qaıtardy.
Profılaktıkalyq is-shara barysynda mektepterde «Kámeletke tolmaǵandardyń ákimshilik jáne qylmystyq jaýapkershiligi», «Beıtanys adamdarmen qarym-qatynas erejeleri», «Jol qozǵalysy erejeleri», «Qazirgi zamanǵy januıadaǵy qundylyqtar», «Úıden ruqsatsyz ketý jáne olardyń sebepteri» taqyryptarynda dárister men áńgimeler ótkizildi.
Jyl basynan Petropavlda 789 zańdy ókil ákimshilik jaýapkershilikke tartyldy. Olardyń ishinde 65-i – balalardyń spırttik ishimdikterdi ishkeni, 33-i – kóńil kóterý oryndarynda bolǵany, 528-i – turǵyn úıden tys jerde túngi ýaqytta júrgeni úshin jazalandy.
