Petropavlda túrme qyzmetkeri aýladan myltyq taýyp aldy
PETROPAVL. QazAqparat – Petropavlda ES-164/1 mekemesiniń qyzmetkeri kópqabatty úılerdiń aýlasynan ańshy myltyǵyn taýyp aldy, dep habarlaıdy QazAqparat tilshisi.
SQO qylmystyq-atqarý júıesi departamenti baspasóz qyzmetiniń málimetinshe, ES-164/1 mekemesiniń rejım jáne kúzet bóliminiń korpýs boıynsha aǵa qyzmetkeri Roman Kımbaev tústen keıin aýysymnan kele jatqan. Shoqan Ýálıhanov kóshesindegi 17 úıdiń podeziniń janynda qardan shyǵyp turǵan myltyqtyń dúmin kóredi. Qardy arshı kele onyń ańshy myltyǵy ekenin kórgen. Tájirıbeli maman birden «102» nómirine habarlasyp, ózi polıtseıler kelgenshe qarý tabylǵan oryndy kúzetke alady.
Oqıǵa ornyna jetken jedel tergeý toby qarýdy alyp, saraptamaǵa jiberdi.
«Aýysymnan shyqqan qyzmetkerimiz kásibıligin jáne joǵary azamattyq ustanymyn kórsetti. Myltyqty oınap júrgen balalalar taýyp alsa nemese basqa bireýdiń qolyna tússe ne bolar edi? Ol qarýmen qylmys jasalyp, onda qylmyskerdiń saýsaq izi de qalýy múmkin», - deıdi ES-164/1 mekemesi bastyǵynyń tárbıe isi boıynsha orynbasary Altaı Júnisov.
