Petropavlda túrli jaraqat alǵan 4 jasar balanyń anasy áleýmettik jelide kómek surady
PETROPAVL. KAZINFORM – Petropavlda qoly synyp, túrli jaraqat alǵan 4 jasar búldirshinge qatysty sotqa deıingi tergeý bastaldy. Anasy balanyń baspaldaqtan qulaǵanyn aıtqan. Dárigerler bolsa, búldirshindi bireýdiń aıaýsyz urǵanyn aıtyp, polıtsııaǵa habarlady.
Soltústik Qazaqstan oblysy polıtsııa departamenti baspasóz qyzmetiniń málimetinshe, 23 qyrkúıek kúni Petropavldaǵy emdeý mekemeleriniń birinen habarlasyp, 4 jasar balanyń túrli dene jaraqatymen túskenin aıtqan.
QR Qylmystyq kodeksiniń «kámeletke tolmaǵanǵa qatysty densaýlyqqa qasaqana aýyrlyǵy ortasha zııan keltirý» baby boıynsha sotqa deıingi tergeý bastaldy.
Bul oqıǵaǵa qatysty SQO bilim basqarmasy da túsinik berdi.
«Oblystyq kópbeıindi balalar aýrýhanasy men Petropavl qalalyq polıtsııa basqarmasynan qyzmettik hat keldi. 2020 jyly týǵan M. aýrýhananyń travmatologııa bólimine qolynyń oń jaq súıekteriniń jabyq synýymen, keýde qýysynyń, arqasynyń, jambastyń jáne t. b. jerleriniń kógerip, zaqymdanýymen túsken. Kámeletke tolmaǵan M. anasymen birge shuǵyl túrde aýrýhanaǵa jatqyzyldy.
Travmatolog dárigerdiń qorytyndysyna sáıkes, balada uryp-soǵý izderi bar: basynda gematomalar, oń ıyqta, arqada, eki bóksede, eki jambasta, tize býyndarynda kógerýler anyqtaldy.
Qazirgi ýaqytta kámeletke tolmaǵan M.-ǵa dene jaraqatyn salǵan adam anyqtalmaǵan. Kámeletke tolmaǵanǵa dene jaraqatyn keltirý faktisi boıynsha onyń anasy Ş. tolyq málimet bermeıdi, aıtýynsha, kámeletke tolmaǵan ózine abaısyzda zııan keltirgen», - delingen baspasóz habarlamasynda.
Vedomstvo mamandarynyń aıtýynsha, QR ÁQBtK-niń 127-baby 1-bóligi boıynsha Ákimshilik quqyq buzýshylyq jasaý faktisi bar, atap aıtqanda, kámeletke tolmaǵan balaǵa qatysty qaýipsizdik sharalaryn qamtamasyz etpeý.
«Osyǵan baılanysty M.-ny sotqa deıingi tergeý júrgizý kezinde Qyzyljar aýdany Arhangelskoe aýylyndaǵy ómirlik qıyn jaǵdaıdaǵy balalardy qoldaý ortalyǵyna ornalastyrý máselesi qaraldy. Óıtkeni kámeletke tolmaǵan M.-nyń anasymen birge turýy onyń ómiri men densaýlyǵyna qaýip tóndirýi múmkin.
26 qyrkúıekte qamqorshylyq bóliminiń qyzmetkerleri mán-jaıdy anyqtaý úshin Ş.-ǵa bardy. Áıel balalardyń ákesimen qarym-qatynas jasamaıtynyn túsindirdi, burynǵy kúıeýiniń júrgen jeri oǵan belgisiz, al bala jaraqattardy qulap alǵanyn aıtty.
Ş.-nyń úlken uly ata-anasynyń qamqorlyǵynsyz qalyp, balalardy qoldaý ortalyǵyna ornalastyryldy. Balanyń anasyna ortalyqtyń baılanys nómiri berildi, ata-ana mindetterin oryndaýǵa qatysty zańnama normalary túsindirildi», - delingen SQO bilim basqarmasynyń baspasóz habarlamasynda.
Al túrli jaraqat alǵan 4 jasar balanyń anasy kómek surap, áleýmettik jelide jazba qaldyrdy.
Buǵan deıin Petropavlda 17 jastaǵy bozbalany júrginshi jolaǵynda júk kóligi qaǵyp ketkenin jazǵan edik.
