Petropavlda túri bir-birinen aýmaıtyn alaıaqtardyń qylmysy áshkerelendi

Petropavl qalalyq soty 38 jastaǵy B., 47 jastaǵy P. jáne 44 jastaǵy K-ge qatysty qylmystyq isti qarady. Olar aldyn ala sóz baılasý arqyly alaıaqtyq jasaǵany úshin kináli dep tanyldy (Qylmystyq kodekstiń 190-baby 3-bóligi 1-tarmaǵy).

Sotta anyqtalǵanyndaı, 2019 jyldyń kókteminde olar sóz baılasyp, sybaılastardyń biriniń páterin zańsyz satqan. Qylmyskerlerdiń biri páterdi satyp alýshyny taýypty. Úı ıesiniń ózi (ekinshi sybaılas) páteriniń menshik quqyǵyn aıqyndaıtyn qujattaryn serigine tapsyrǵan. Túri oǵan uqsas úshinshi sybaılas ózin úıdiń ıesi retinde kórsetip, páterdi satyp jiberedi.

Alaıaqtyq jasaǵandar túsken qarajatty ózara bólip alypty. Satyp alýshyǵa 8 mıllıon teńge kóleminde zııan keltirilgen. Osydan keıin, páterdiń ıesi, ıaǵnı osy alaıaqtyqqa qatysýshy páterdi satý men satyp alýdy azamattyq turǵydan jaramsyz dep tanyp, oǵan degen quqyǵyn qalpyna keltirýdi kózdegen. Óıtkeni aıtýynsha ol ózi páterin «satpaǵan».

Páter ıesi óz kinásin moıyndamady. Sotta alaıaqtyq jasaǵan qalǵan eki qatysýshyny tanymaıtynyn málimdegen. Ol ózin bylaı aqtap alady: B. onyń páteriniń kiltin urlap, kirip, qujattardy alyp, múlikti jábirlenýshige satqan. Ol jábirlenýshi óziniń páterin satyp alǵanyn aıtqannan keıin ǵana páterdi satý-satyp alýdy jaramsyz dep taný úshin sotqa júgingen-mys.

Qalǵan eki sottalýshy - B. men K. óz kinásin tolyq moıyndady. Olar ózderi men úı ıesiniń arasyndaǵy alaıaqtyq isteý úshin aldyn-ala sóz baılasqanyn rastaǵan.

Sot aıyptalýshylardyń kinásin tolyq dáleldendi dep sanady. Sottalýshylar B. men K-niń kinálaryn moıyndaýmen qatar, kýágerlerdiń, notarıýstyń, rıeltorlardyń, jábirlenýshiniń, qoljazbalar men qoltańbalardyń sot-medıtsınalyq saraptamasynyń qorytyndysy olardyń aıybyn aıǵaqtap bergen.

Sot sottalýshylardyń úsheýin de kináli dep tanydy. Úı ıesi sanalǵan sottalýshy 3 jylǵa sottalsa, onyń sybaılastary 4 jáne 4 jarym jylǵa bas bostandyǵynan aıyryldy. Sot úkimi zańdy kúshine engen joq.