Petropavlda turǵyndar toı ótkizgenderdi tıisti organdarǵa ózderi habarlap jatyr
PETROPAVL. QazAqparat – Petropavlda senbi-jeksenbi karantındik sharalar kúsheıtilgenine qaramastan, meıramhanalarda toı ótkizgender turǵyndardyń kómegimen anyqtaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, ótken senbi kúni qala turǵyndary jas jubaılardyń «Kongress» meıramhanasyna kirip bara jatqanyn fotoǵa túsirip, áleýmettik jelilerge jarııalaǵan.
«Bári úıde otyrýy kerek, eger osy úılený toıynda kem degende bireý aýyrsa, ol bárine juqtyrady, jaǵdaı onsyz da máz emes, al sizderge báribir toılatý kerek», - dep jeli qoldanýshylary jazba qaldyrdy.
Buǵan polıtsııa qyzmetkerleri men sanıtarlyq dárigerler birden áreket etip, tekseris uıymdastyrdy. Derek rastalyp, nátıjesinde meıramhana ıesi men is-sharany uıymdastyrýshyǵa qatysty QR ÁQtK 462-baby boıynsha ákimshilik materıal jınady.
Petropavl turǵyndary polıtseılerge «Emırat» meıramhanasynda da toı ótip jatqanyn habarlaǵan. Toı ıesi men kóńil kóterý orny ákimshiligine de endi aıyppul salynbaq.
Jalpy, Petropavlda tótenshe jaǵdaı alynǵannan beri sońǵy eki aıdyń ishinde osyndaı 5 derek anyqtaldy.
«Qazirgi ýaqytta vırýstyń taralmaýyna turǵyndar da jaýapty. Ózimizdi shektep, talaptardy oryndaǵanda ǵana bul qaýipti indetpen kúrese alamyz. Ókinishke oraı, buǵan barlyǵy túsinistik tanyta bermeıdi, osyǵan baılanysty profılaktıkalyq sharalardan ákimshilik yqpaly bar sharalarǵa kóshýge týra keledi. Tótenshe jaǵdaı rejımi alynǵannan bastap, karantındik sharalardy saqtamaǵany úshin 127 ákimshilik materıal jınaldy», - deıdi SQO PD bastyǵynyń birinshi orynbasary Qanat Aıtbaev.
Bas sanıtarlyq dárigerdiń qaýlysyn saqtamaǵandarǵa 3-ten 200 AEK mólsherinde aıyppul qarastyrylǵan.
