Petropavlda turǵyn úıden órt shyqqanda er adam lıftide qalyp qoıǵan
PETROPAVL. QazAqparat – Petropavlda 9 qabatty úıden órt shyǵyp, bir turǵynnyń denesiniń 75% kúıik shalsa, taǵy bir adam lıftide qalyp qoıǵan, dep habarlaıdy QazAqparat tilshisi.
Soltústik Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, Petropavldaǵy Abaı kóshesi, 59 mekenjaıyndaǵy 9 qabatty úıde órt shyqqandyǵy jóninde habar saǵat 16.13-te túsken.
Oqıǵa ornyna jetken órt sóndirýshiler 6-qabattaǵy 2 bólmeli páterdiń janyp jatqanyn anyqtaǵan. Úı kireberisiniń joǵary qabattary qoıý tútinge oranǵan.
Órt sóndirýshiler jalynmen kúrese júrip, satymen 78 adamdy, sonyń ishinde 18 balany qaýipsiz jerge shyǵardy. Taǵy eki adamdy ólimnen qutqaryp qaldy.
47 jastaǵy er adam - ekinshi toptaǵy múgedek qutqarýshylar kelgende páterinde es-tússiz, aýyr halde jatqan. Denesiniń 75% kúıik shalǵan ol aýrýhanaǵa jetkizildi.
Qutqarylǵan ekinshi adam órt bastalǵanda lıftide bolǵan. Elektr qýaty óshken kezde 7 men 8-qabattardyń arasynda shyǵa almaı, qalyp qoıǵan. 35 jastaǵy er adamdy órt sóndirýshiler aman-esen lıftiden shyǵardy. Oǵan medıtsınalyq kómektiń qajeti bolmady.
«Qoıý tútinge baılanysty er adamnyń ómirine qaýip tóndi. Sol sebepti lıftiń esigin buzýǵa týra keldi. Sańylaý arqyly oǵan qysylǵan aýa bar qutqarý kapıýshonyn berdik. Alyp shyqqansha deıin er adammen psıhologtar jumys istedi. Lıftiden shyǵarǵanda jaǵdaıy jaqsy bolyp, aýrýhanaǵa barýdan bas tartty. Adamdardy qaýipsiz jerge shyǵarý úshin avtosatyny qoldana almadyq. Kópqabatty úıdiń aýlasynda avtokólikterdiń kóptiginen bos oryn bolmady», - deıdi № 1 mamandandyrylǵan órt sóndirý bólimshesi bastyǵynyń orynbasary Marat Nurǵalıev.
Saǵat 16.38-de órt tolyǵymen sóndirildi. Tilsiz jaýmen kúreske 26 maman jáne 8 tehnıka jumyldyryldy.
Aldyn ala boljam boıynsha, zardap shekken er adam tóseginde jatyp shylym shekken.
