Petropavlda turǵyn úıden órt shyǵyp, 87 adam qaýipsiz jerge shyǵaryldy
PETROPAVL. QazAqparat – Petropavlda kóp qabatty turǵyn úıdegi páterden órt shyqty. Úıdiń ıesi er adam aýyr jaǵdaıda aýrýhanaǵa tústi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa búgin túnde bolǵan. Saǵat 1.42 mınýt ketkende 101 telefon nómirine Bolatbaev kóshesindegi 32-úıdiń 9-shy qabatyndaǵy páterden órt shyqqandyǵy jaıynda habar túsedi.
Birden Petropavldaǵy № 2, № 3 órt sóndirý bólimsheleri jeke quramynan 24 adam, 6 tehnıka jumyldyryldy. Eki jedel járdem kóligi ekıpajy, tártip saqshylary jetti.
Toǵyz qabatty úıde 144 páter bar. Órt ekinshi podezdiń 9-qabatynda shyǵypty. Mamandar 87 adamdy, sonyń ishinde eki balany qaýipsiz jerge shyǵardy. Janyp jatqan páterden eki adam – 1960 jylǵy úı ıesi er adam jáne onyń 1959 jyly týǵan áıeli qutqaryldy. Olarǵa alǵashqy medıtsınalyq kómek kórsetilip, er adam aýyr halde 3 qalalyq aýrýhananyń jansaqtaý bólimine jetkizildi.
Órt saǵat 2.19 mınýt ketkende tolyq sóndirildi. Páterge aıtarlyqtaı zaqym keldi, dúnıe-múlik, úı ıeleriniń jeke zattary janyp ketti. Qazirgi boljam boıynsha, otty abaısyz paıdalaný sebep bolǵan.
