Petropavlda turǵyn úıdegi órt bir adamnyń ómirin qıyp ketti
PETROPAVL. QazAqparat – Petropavldaǵy Podgora yqshamaýdanyndaǵy úıden órt shyǵyp, saldarynan bir adam mert boldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, órt Petropavldaǵy 308 Krasnoznamennyı polk, 31 kóshesindegi úıden búgin shamamen saǵat 10.44 mınýt ketkende shyqqan. Úıdiń kók tútinge oranǵanyn kórshisi baıqap qalyp, birden mamandardy shaqyrǵan.
Órtti sóndirýshiler oqıǵa ornyna 5 mınýt ishinde jetti. Olar úıden 50 jastaǵy esinen tanǵan áıeldi alyp shyqty. Jedel járdem qyzmetiniń dárigerleri birden tıisti is-sharalardy júrgizgenimen, ıis tıgen áıeldi aman alyp qala almady.
«Birinshi mamandandyrylǵan órt sóndirý bóliminiń eki arnaıy kóligi jáne jeke quram órt sóndirýge jumyldyryldy. 10 mınýt ishinde sóndirdik. Órt shyqqan aýdan 5 sharshy metr shamasynda», - deıdi SQO TJD jedel kezekshisi Áset Serdalın.
Kórshileriniń sózine qaraǵanda, kóz jumǵan áıeldiń jubaıy jumysyna ketken. Erli-zaıyptylar spırttik ishimdikterge áýes bolǵan.
Mamandar órttiń shyǵý sebebin anyqtap jatyr.
