Petropavlda turǵyn úıde bolǵan órtten 4 adam qutqaryldy
PETROPAVL. QazAqparat – Petropavlda úsh qabatty baspana órtenip, 16 adamdy evakýatsııalaýǵa jáne 4-in qutqarýǵa týra keldi. Onyń ishinde balalar da bar, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin saǵat 01.16 mınýt ketkende 101 nómirine Petropavldaǵy Rýjeınıkov kóshesi, 97 mekenjaıynda órt shyqqandyǵy jóninde habar túsedi. Úsh qabatty, eki kireberisti, shlak bloktan salynǵan turǵyn úıdiń ekinshi kireberisinde qoıý tútin shyqqan. Sondaı-aq birinshi qabattaǵy qosalqy úı-jaıdyń kireberis esigi janyp, turǵyndar ózdiginen dalaǵa shyǵa almaı qalǵan.
Oqıǵa ornyna kezekshi qaraýyl 8 mınýtta jetti. Birden evakýatsııalyq is-sharalar bastalyp, gaztútinnen qorǵaý qyzmeti mamandary 16 adamdy, sonyń ishinde 4 balany qaýipsiz jerge shyǵardy.
Taǵy tórt adam qutqarý kapıýshondarynyń kómegimen órt ornynan shyǵaryldy. Qutqarylǵandardyń biri - 2005 jyly týǵan bala. Iis tıip ýlanǵan balany qutqarýshylar úıden kóterip shyǵardy.
Mamandardyń aıtýynsha, órt shamamen saǵat 2.00-de tolyq sóndirildi. Órt saldarynan 3 sharshy metr aýmaqta qabyrǵa men esik búlingen.
Qaza bolǵandar joq. Iis tıgen bala aýrýhanaǵa jatqyzyldy. Órttiń shyǵýyna otty abaısyz qoldaný sebep bolýy múmkin.
