Petropavlda turǵyn úı órtenip, eki adam kóz jumdy
Órt sóndirýshilerdiń aıtýynsha, 7 shilde kúni saǵat 8.59 mınýt ketkende 101 pýltine Petropavldaǵy Fýrmanov kóshesindegi 73-úıdiń janyp jatqandyǵy jóninde habarlama tústi.
«Órt sóndirýshiler sanaýly mınýtta jetti. Olar kelgen kezde eki páterli jeke úıdiń bir páteri janyp jatqan. Shamamen 10 mınýttan keıin mamandar órt ornynan eki adamnyń denesin tapty», - deıdi Petropavl qalalyq tótenshe jaǵdaılar basqarmasy bastyǵynyń mindetin atqarýshy Ázimhan Merǵasymov.
Qaza tapqandardyń bireýi 1944 jyly týǵan er adam, ekinshisi 1985 jylǵy áıel.
«Kórshileri úıde taǵy 15 jastaǵy er bala jáne 14 jastaǵy qyzdyń bolýy múmkindigin aıtty. Olar aman, órt bastalǵan kezde úıden ózdiginen shyqqan eken. Sondaı-aq kórshileri sol kúni tańǵy saǵat 6.00 kezinde úı ıeleriniń janǵan tósek-oryndy sóndirgenin aıtty. Órttiń shyǵýyna sóndirilmegen temeki tuqyly sebep bolýy múmkin», - deıdi Ázimhan Merǵasymov.
77 jastaǵy er adam ózdiginen qozǵala almaıtyn múgedek bolǵan, ıaǵnı ol tósekte otyryp shylym shege bergen. Bul joly onyń temekisiniń shoǵy tósekke túsýi múmkin.
«Olar tósek-oryndy sóndirdik dep úıdiń kireberisine kirgizgen. Órt sol jerden shyqqan. Qazir kórshilerine keltirilgen jáne jalpy shyǵyn mólsheri eseptelip jatyr. Eki páterlik úıdiń ekinshisin jóndep, qalypqa keltirýge bolady. Bul úı osymen ekinshi ret órtenip otyr. 2015 jyly shatyry janǵan edi, ol joly órt peshten shyqty», - deıdi basqarma bastyǵynyń mindetin atqarýshy Ázimhan Merǵasymov.
