Petropavlda turǵyn úı órtenip, bir áıeldi kúıik shaldy
PETROPAVL. QazAqparat – Petropavlda eki páterli turǵyn úıden órt shyǵyp, 54 jastaǵy áıeldi kúıik shaldy, - dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqys oqıǵa 9 shilde kúni bolǵan. 101 qyzmetine Petropavldaǵy 1-Lınııa, 22 meken jaıyndaǵy eki páterli turǵyn úıde órt shyqqandyǵy jóninde habarlama saǵat 14.22-de túsedi.
Órt sóndirýshiler kelgende úıdiń 8 sharshy metr bolatyn kireberis dálizi lapyldap janyp jatqan. Jalyn shamamen jarty saǵattyń ishinde sóndirildi. Dáliz tolyq janyp ketti. Aldyn ala boljam boıynsha, órt durys sóndirilmegen temeki tuqylynan shyǵýy múmkin.
Baspana jalǵa berilip kelgen eken. Jalǵa alýshy – 1967 jylǵy áıel kúıik aldy, sondaı-aq ıis tıgen eken. Ol aýyr jaǵdaıda aýrýhanaǵa jetkizildi.
