Petropavlda qyrkúıekten bastap jylý tarıfi ózgeredi
PETROPAVL. KAZINFORM — Petropavlda bıznes úshin tarıf bıyl 1 mamyrdan bastap — 20%, turǵyndar úshin 1 qyrkúıekten 15% ósti. Al bıýdjettik uıymdar úshin tarıf shamamen eki esege artty.
Bul týraly «Petropavl jylý jelileri» JShS dırektory Vıtalıı Holosha Soltústik Qazaqstan oblysy Kásipkerler palatasynyń óńirlik keńesi otyrysynda málimdedi.
— Bes jyldyq tarıf naýryz aıynda bekitildi. Qazir tarıfti túzetý boıynsha jumys júrgizip jatyrmyz. Bıylǵy jylytý maýsymynda turǵyndar men zańdy tulǵalar úshin qosymsha ósim bolmaıdy, — dedi Vıtalıı Holosha.
Onyń aıtýynsha, jylý tarıfine elektr stantsııasynan energııa satyp alý, jylý jelilerin paıdalaný, qyzmetkerlerdiń eńbekaqysy, qubyrlar men jabdyqtardy jóndeý shyǵyndary kiredi.
Kásipkerler jıynda jylý shyǵynyn esepteý ádistemesine de qatysty suraq qoıdy. Óńirlik keńes músheleri jeltoqsanda da, sáýirde de jylý shyǵynynyń somasy aıtarlyqtaı ózgermeıtinin aıtty.
Kásiporyn basshysy jylý shyǵyny qubyrdyń uzyndyǵyna, oqshaýlaýyna, onyń jer astynda nemese jer ústinde ornalasýyna jáne ortasha aılyq aýa temperatýrasyna baılanysty esepteletinin túsindirdi. Óz jylý jelilerin qaıta jańǵyrtqan nemese kúrdeli jóndeýden ótkizgen kásiporyndar shyǵyn koeffıtsıentin qaıta esepteýge ótinish bere alady.
Kásipkerler sondaı-aq shaǵyn «úı janyndaǵy» dúkenderge jeke tarıf belgileýdi nemese olardy jeke tulǵalar sanatyna teńestirýdi usyndy. Alaıda qoldanystaǵy zańnamada tutynýshylardyń úsh sanaty ǵana qarastyrylǵandyqtan, jeke kommertsııalyq nysandar úshin tarıfti tómendetý múmkin emes ekeni aıtyldy.
Kezdesý qorytyndysynda Kásipkerler palatasy mundaı talqylaýlar bızneske kommýnaldyq shyǵyndardy aldyn ala josparlap, kásiporyndardyń qarjylyq táýekelderin baǵalaýǵa múmkindik beretinin atap ótti.
Buǵan deıin Qostanaı oblysynda jylý tarıfi qaıta qaralǵanyn jazǵan edik.
