Petropavlda turǵyn úı órtenip, eki adam zardap shekti
PETROPAVL. KAZINFORM – Petropavldaǵy Jumysshy kentindegi jeke turǵyn úıde bolǵan órtten er adam men áıel kúıik alyp, jaraqattandy.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin «101» jedel arnasyna saǵat 5.52 mınýt ketkende Petropavldaǵy Matveev kóshesindegi jer úıdiń órtenip jatqandyǵy týraly habar túsken.
Oqıǵa ornyna oblys ortalyǵynyń eki órt sóndirý bóliminiń 16 mamany men 4 tehnıkasy jiberildi. Órt sóndirýshiler kelgende úıdiń kireberis bólmesi otqa oranyp úlgergen eken.
Tańǵy saǵat 7.00-ge jaqyn órt tolyǵymen sóndirildi. Jalyn 30 sharshy metrdi sharpyǵan. Baspananyń kireberisi, úıdiń tóbesi men shatyry zaqymdandy. Úıdi órt sóndirýshiler aman alyp qaldy.
Oqıǵa ornynda bolǵan eki adam – 45 jastaǵy áıel men 40 jastaǵy er adamdy kúıik shaldy, azdaǵan jaraqat aldy, alaıda ómirlerine keler qaýip joq. Olarǵa tıisti medıtsınalyq kómek kórsetildi.
Órttiń neden shyqqany anyqtalyp jatyr.
