Petropavlda turaqtandyrý qorynyń azyq-túligin qaıdan alýǵa bolady
PETROPAVL. QazAqparat – Soltústik Qazaqstan oblystyq Kásipkerlik jáne týrızm basqarmasy ókilderi turaqtandyrý qory qandaı ónimdi qandaı baǵada jetkizetinin aıtty, dep habarlaıdy QazAqparat tilshisi.
Mekemeniń aqparaty boıynsha, oblystyq azyq-túlik turaqtandyrý qorynan saýda oryndaryna qaraqumyq, kúnbaǵys maıy, kartop, sábiz, pııaz, qyryqqabat, un jáne makaron ónimderi túsedi.
Basqarma málimetine sensek, qaraqumyqtyń bir kelisi 130 teńge, al arnaıy qaptalǵandarynyń 800 gramy – 180 teńgeden bolmaq. «Zarechnoe» kúnbaǵys maıynyń lıtriniń baǵasy 370 teńge. Kartoptyń kelisiniń bólshek baǵasy 65 teńge, sábiz – 85, pııaz – 66 jáne qyryqqabat 85 teńgeden bolady. Birinshi sortty «DEZ» unynyń eki kelilik qaby 253 teńge, salmaǵy 1,8 keli «Tamerlan» unynyń bir qaby 261 teńgeden aspaıdy. Turaqtandyrý qorynan túsetin makarondardyń bir kılogramynyń baǵasy 192 teńgeden aspaýy kerek.
Bul ónimder Petropavldaǵy sharýashylyq bazary, «Korona» saýda úıiniń janyndaǵy bazar, «Taıga» saýda-naryqtyq kesheni jáne «Semeınyı», «Severnyı», «Aısberg» jáne «Pıramıda» sýpermarketinde satylady.
Jumyrtqa baǵasyna keler bolsaq, mekemedegiler olardyń baǵasy qalaı anyqtalatynyn jáne baǵada nelikten úlken aıyrmashylyq baryn túsindirdi.
«Jumyrtqa baǵasyn turaqtandyrý maqsatynda oblystyq ákimdik qus fabrıkalary jáne saýda oryndarymen memorandým jasady. Memorandým erejesi boıynsha iske asyrý tek belgilengen tómendetilgen baǵalar boıynsha ǵana múmkin bolady. Qus fabrıkalary aı saıyn bólshek saýda oryndaryna 3 myń qorap jumyrtqa jetkizedi. Birinshi sanattaǵy on dana jumyrtqanyń bólshek baǵasy 190 teńge. Memorandým oblys ortalyǵyndaǵy 48 núkteni qamtydy», - dep málimdedi basqarmadaǵylar.
Jumyrtqany odan joǵary baǵamen satatyn saýda oryndary memorandýmǵa kirmeıdi. Baǵa jumyrtqanyń sanaty men qaptamasyna qaraı ártúrli bolatynyn eskergen jón.
Avtory Olesıa Jýkoven
