Petropavlda týra oqý jyly bastalǵanda jergilikti ýnıversıtet ǵımaraty apatty dep tanyldy
PETROPAVL. KAZINFORM — Petropavldaǵy jalǵyz ýnıversıtet jańa oqý jylynda bir ǵımaratyn jabýǵa májbúr. Apatty dep tanylǵan nysandy jónge keltirýge, aldyn ala esep boıynsha 1 mlrd teńgeden astam qarajat kerek eken.
M.Qozybaev atyndaǵy Soltústik Qazaqstan ýnıversıtetiniń basqarma tóraǵasy-rektor Erbol Isaqaev osyǵan qatysty túsinik berdi.
«Ýnıversıtettiń óz ınfraqurylymy bar. Ol — oqý korpýstary, jataqhanalar, basseın, observatorııa. Bıyl oqý ornynyń úshinshi korpýsyn — Til jáne ádebıet ınstıtýtynyń ǵımaratyn jabýǵa týra keldi. Munda oqıtyn stýdentter men oqytýshylardy basqalaryna bólip ornalastyrdyq. Eki jyl buryn ǵımarattyń jaı-kúıin bilý úshin saraptama júrgizdik. Ony júrgizgen kompanııanyń qorytyndysy boıynsha nysannyń irgetasy, jabyny buzylyp jatyr. Osyǵan baılanysty qaýipsizdik maqsatynda ǵımaratty japtyq. Taǵy da qosymsha saraptama júrgizemiz», — deıdi Erbol Isaqaev.
Rektordyń aıtýynsha, bul korpýs ýnıversıtettiń eń alǵash salynǵan ǵımarattarynyń biri. 1958 jyly paıdalanýǵa berilgen.
«Ǵımarat kirpishten salynǵanymen, shatyry aǵashpen jabylǵan. Ol salynǵannan beri aýystyrylmaǵan. Ózindik stıli bar nysan. Qazir qolymyzda 1 mlrd teńgeden astam qarajatqa jóndeý boıynsha jobalyq-smetalyq qujat bar. Ázirge naqty sheshim qabyldaǵan joqpyz, qosymsha saraptamadan keıin ǵana belgili bolady», — deıdi Erbol Isaqaev.
Til jáne ádebıet ınstıtýtynyń 700-den astam stýdenti bar.
Al jalpy joǵary oqý orny bıyl 1-kýrsqa 1600 adam qabyldady. Byltyr 865 grant berilse, bıyl 1100 stýdent tegin bilim alady.
Buǵan deıin SQO-da tasqynnan zardap shekken mektep túlekterine qosymsha 136 grant berilgenin jazǵan edik.
