Petropavlda túngi saýyq keshinde bolǵan 40 shaqty adam jaýapkershilikke tartyldy
PETROPAVL. QazAqparat – Petropavldaǵy kottedjderdiń birinde saýyq keshin uıymdastyrǵandar da, oǵan qatysqandar da – barlyǵy 40 shaqty adam ákimshilik jaýapkershilikke tartyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, túngi saǵat 2.00 shamasynda turǵyndar «102»-ge N ovatornaıa, 4 mekenjaıyndaǵy jastardyń shýyna qatysty qońyraý shalǵan.
Shaqyrtýǵa birden avtopatrýlder attanyp, polıtseıler jastardyń saýyǵynyń ústinen túsken. Spırttik ishimdik ishken olar shýlap, tynyshtyqty buzyp, kórshilerdiń mazasyn alǵan.
Aýmaǵynda monshasy bar jalǵa berilgen eki qabatty kottedjde polıtseıler 42 adamdy ustady, olardyń 12-si jasóspirim. Jastardyń kópshiligi bul jıynǵa «Instagramm» áleýmettik jelisinde jarııalanǵan shaqyrtýmen kelgen eken.
Jasóspirimderdiń barlyǵy Petropavl qalalyq polıtsııa basqarmasyna jetkizildi. Olardyń ata-analaryna balalarynyń beımezgil ýaqytta júrgeni úshin jáne karantın talaptaryn buzýǵa qatysty eki ákimshilik hattama toltyryldy. Al úsh ata-ana 18-ge
tolmaǵan balalarynyń qoǵamdyq orynda mas bolǵany úshin de jaýap bermek.
Saýyq keshinde bolǵan barlyq eresekterge karantın talaptaryn buzýǵa qatysty ákimshilik materıal jınaldy. Taǵy 14 adamǵa tynyshtyqty buzǵany úshin hattama toltyryldy.
«Kottedj ıeleri zańsyz kásipkerlikpen aınalysqany úshin jaýapqa tartylady. Óz baspanasyn osyndaı toı-tomalaqqa jalǵa beretinderdiń saldarynan olardyń kórshileri zardap shegedi. Qazir qalalyq pablıkterde úılerin osylaısha jalǵa beretinder kóbeıdi. Biz olardy tekseretin bolamyz. Al bul oqıǵa basqa ata-analarǵa sabaq bolady dep oılaımyn. Eń aldymen balalarynyń qaýipsizdigi úshin olardyń qaıda júrgenin bilip otyrýlary kerek», - deıdi SQO PD bastyǵy Marat Tólebaev.
Eki qabatty úıdiń ıesi 1972 jyly týǵan Petropavl turǵyny. Oǵan qatysty memlekettik kirister basqarmasyna tıisti habarlama jiberildi. Al jalǵa berilgen kottedjdiń ákimgeri, 1991 jyly týǵan kelinshek mas bolǵan, polıtsııaǵa jóndi eshteńe aıta almaǵan. Shý shyǵarǵan ári qarsylyq bildirgen ol ýaqytsha beıimdeý jáne detoksıkatsııa ortalyǵyna ornalastyryldy. Áıel de karantın talabyn buzǵany úshin jaýap beretin bolady.
