Petropavlda túnde jurttyń mazasyn alatyn turǵyn májbúrli túrde emdeletin boldy
PETROPAVL. QazAqparat – Petropavlda jyl basynan tún tynyshtyǵyn buzǵandarǵa 900 astam hattama toltyryldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, jaz kelisimen túnde toı toılaıtyn kórshilerine shaǵymdanyp, polıtsııa shaqyratyndar kóbeıgen. Ásirese jalǵa beriletin páterlermen kórshi turatyndardan maza ketedi.
Maýsym aıynyń basynda tártip saqshylary jalǵa alynǵan páterde týǵan kúndi toılaǵan bir top stýdentti jaýapkershilikke tartty. Olardyń dastarhanynda spırttik ishimdik bolmasa da, ózderin tym erkin ustap, shýlaǵan.
«Páterdi jalǵa beretin bıýrolardyń ıelerimen únemi profılaktıkalyq áńgime júrgiziledi. Ýchaskelik ınspektorlar olarǵa mas kúıde keletin klıentterge qyzmet kórsetpeýdi usynady. Sondaı-aq tótenshe jaǵdaı rejımi alynǵanymen karantın talaptary kúshin joıǵan joq. Sol sebepti jalǵa alynǵan páterde bas qosyp toılaý – qaýipti ınfektsııanyń taralýyna ákelýi múmkindigin eske salamyz», - deıdi SQO PD bastyǵynyń birinshi orynbasary Qanat Aıtbaev.
Tynyshtyqty buzǵandarǵa 5 AEK mólsherinde aıyppul qarastyrylǵan. Polıtseılerdiń aıtýynsha, ádette aıyppul salǵannan keıin kópshilik tynyshtalady. Jurttyń mazasyn alyp, shýlaıtyndar negizinen ishimdikke áýes jandar.
Solardyń biri - Petropavldyń 1983 jyly týǵan turǵyny óz páterine únemi maskúnemderdi jınap, spırttik ishimdikter ishken. Oǵan birneshe ret aıyppul da salynǵan eken. Nátıjesi bolmaǵannan keıin aǵasy aryz jazyp, sonyń negizinde ýchaskelik polıtseıler ony alkogolızmnen májbúrli emdetýge materıal jınady.
Jalpy SQO-da jyl basynan tún tynyshtyǵyn buzǵandarǵa 911 hattama toltyryldy. Onyń basym bóligi – 730 jaǵdaı Petropavlǵa tıesili.
