Petropavlda túnde serýendegen 52 jasóspirim polıtsııaǵa jetkizildi
PETROPAVL. QazAqparat – Petropavlda qańtar aıynda túnde kóshede eresektersiz jalǵyz júrgen 52 jasóspirim polıtsııaǵa jetkizilgen, olardyń 62 zańdy ókili ákimshilik jaýapkershilikke tartyldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jasóspirimderdiń qaýipsizdigi jáne olardyń tarapynan bolatyn qylmystar men quqyq buzýshylyqtardyń aldyn alý maqsatynda turaqty túrde is-sharalar uıymdastyrylady.
Tek qańtarda petropavldyq ıývenaldyq polıtseıler 13 profılaktıkalyq reıd júrgizgen. 90 quqyq buzýshy ákimshilik jaýapkershilikke tartyldy, olardyń 62-si túnde beısaýat júrgen jasóspirimderdiń zańdy ókilderi. Reıdtik is-sharalar barysynda 52 bala ishki ister organdaryna jetkizildi. Bireýi ishki ister organdaryna esepke alyndy. Sondaı-aq, qańtarda kámeletke tolmaǵandardyń isteri jónindegi ınspektorlar balalardy tárbıeleýde mindetterin oryndamaǵany úshin bir ata-anany anyqtap, tirkedi. Búgingi tańda osyndaı 110 otbasy esepte tur.
«ıÝvenaldyq polıtsııanyń mekteptegi ınspektorlary búginde 24/7 rejıminde oqýshylar jáne olardyń ata-analarymen baılanysta bolýǵa tyrysady. Karantındik sharalar, qashyqtan oqý tártip saqshylaryna qosymsha salmaq túsirdi. Eger buryn ınspektorlar balalarmen kún saıyn kezdesse, qashyqtan oqytý kezinde jasóspirimder kóbine ózderimen-ózderi bolady. Bul qylmys pen quqyq buzýshylyqtyń qaýpin arttyrady. Ata- analardyń, polıtsııa qyzmetkerleri men muǵalimderdiń ortaq mindeti –ýaqytynda baıqaý, sharalar qabyldaý jáne balalardy teris jolǵa túsýden qorǵaý», - deıdi Petropavl qalasy polıtsııa basqarmasy ıývenaldyq polıtsııa bóliminiń bastyǵy Elmıra Abýsheva.
Petropavldyń ıývenaldyq polıtseıleri muǵalimder sııaqty konferentsııalyq sabaqtarǵa júıeli túrde qosylyp, balalarmen quqyqtyq taqyrypta dárister men áńgimeler ótkizedi. Jyl basynan beri kámeletke tolmaǵandardyń isteri jónindegi ınspektorlar qalalyq oqýshylarǵa arnalǵan 330-dan astam onlaın sabaqqa qatysty.
